Tribunal Munisipal Dili (TMD) julga kazu ofensas integridade simples ne’ebe involve LS (arguida) tuda HK (vitima) ho asbak (keramik), tanba vitima ba sisi tusan iha arguida.
Tuir akuzasaun husi Ministeriu Publiku ne’ebe lee sai husi juis prezidente katak, arguida impresta vitima nia osan hamutuk $200, maibe besik fulan 5 ona mos seidauk selu, tanba ne’e iha dia 20 Agostu 2015, oras tuku 10 dader, vitima haruka nia oan ba husu maibe arguida dehan “osan seidauk iha, orsida iha mak fo”.
Tanba vitima sente ladun satisfas, iha loron hanesan oras tuku hat lokraik, vitima rasik ba hamrik iha arguida nia uma oin hodi dehan “hau presiza los osan, sekuandu iha oituan o fo hau lai,” maibe derepente arguida foti asbak ne’e hodi tuda vitima no kona vitima nia liman to’o bubu.
Iha altura ne’eba vitima sente la simu ho attitude arguida nian, tanba ne’e vitima halai kedas ba polisia hodi hato’o keixa.
Hafoin lee sai akuzasaun hirak ne’e, juis prezident husu ba arguida atu hili koalia ou nonok, maibe arguida hili koalia hodi dehan ba tribunal katak, akuzasaun ne’e balun los no balun sala, los mak wainhira vitima mai arguida nia uma hodi husu osan ne’e, iha odamatan deit vitima hakilar deit, la’os koalia didiak.
“Hau moe no nervozu, tanba ne’e hau tuda asbak la’os ho intensaun atu tuda vitima, maibe atu tuda ba odamatan hodi vitima nonok,” arguida deklara.
Maibe, nia dehan, durante prosesu kazu ne’e la’o, arguida husu deskulpa ona ba vitima, ba kurtivu vitima nia moras no fo fila ona vitima nia osan.
Iha tempu hanesan juis prezident husu mos disponibilidade vitima nian hodi hato’o buat ruma ba tribunal, maibe iha altura ne’eba vitima koalia ba tribunal katak agora vitima no arguida diak malu ona, no arguida mos fo fila ona vitima nia osan.
“Nia fo fila ona hau nia osan no ami mos diak malu ona,” vitima deklara.
Hafoin rona tiha deklarasaun husi vitima no arguida, juis deside fo pena suspensaun tinan ida ba arguida, ho intesaun atu eduka arguida labele komete tan krimi iha futuru.
