Tribunal Munisipal Dili (TMD) hala’o julgamentu ba kazu krimi ofensa ba integridade fizika simples ho forma violensia domestika ne’ebe involve arguido SG (la’en) ne’ebe ho kondisaun lanu baku no tebe vitima LG (fen).
Tuir akuzasaun Ministeriu Publiku ne’ebe lee sai husi juis prezidente, katak iha 12 Outubru 2015 kalan tuku tolu madrugada, arguido fila ba uma ho kondisaun lanu, iha altura ne’eba vitima ho oan sira toba dukur hotu, arguido hakilar no haruka vitima sai husi uma.
Tanba iha momentu ne’eba vitima matan sei dukur hela, entaun arguido dada deit nia husi toba fatin, entaun vitima hirus hodi hakilar no mosu diskusaun entre sira nian rua.
Durante diskute malu, arguido la koalia barak, maibe arguido foti sasan sira hodi tuda vitima no kaer vitkima nia liman dada ba liur, tanba lakohi sai ba liur entaun arguido baku no tebe vitima iha kotuk laran no dada tan niania fuuk.
Hafoin lee sai akuzasaun hirak ne’e, juis prezidente husu ba arguido atu hili koalia ou nonok maibe nia hili koalia hodi dehan, nia rekonese hotu sala ne’ebe mak nia halo ba vitima no promete hodi la repete tan aktu hanesan iha future.
“Hau arepende tebes ho hahalok ne’e,” arguido deklara iha audensia julgamentu, iha tribunal.
Iha okaziaun ne’e, arguido mos husu ba vitima atu fila fali ba hela hamutuk ho nia iha sira nia uma, tanba husi akontesementu ne’evitima ho oan sira hela hamutuk ho vitima nia inan aman.
Hafoin rona tiha deklarasaun husi arguido, juis prezidente husu ba lezada atu aponta nia deklarasaun mai tribunal.
No iha altura ne’eba vitima mos hateten katak arguido sempre halo aktu hanesan hemu lanu no fila sempre buka problema ho nia.
“Hau sente la nyaman ho nia hahalok ne’e, hau tauk sekuandu nia hanesan ne’e hela deit, hau sei la fila,” vitima deklara.
Entretantu deklarasaun husi arguido no vitima ne’e aumenta ho provas balun husi Ministeiru Publiku ne’ebe mak provadu katak arguido komete duni krimi ne’e no arguido viola ona lei artigu 145, tanba ne’e juis deside fo pena prizaun fulan rua suspende ba tinan ida.
