Diretora Servisu Saude Munisipio Dili (SSM), Agustina da Costa Saldanha, hateten programa fahe aimoruk vitamina A no Albendazole ne’e ba labarik sira ho rutina hodi prevene sira husi mal nutrisaun.
Nia hateten, programa rutina ne’e tinan ida hala’o dala rua fulan neen (Fevereiru no Agusto), Ministerio Saude iha obrigasaun atu fahe aimoruk ba komunidades inklui iha eskola sira.
“Importante ita bele hadia sira nia nutrisaun liu husi vitamina A no kombate moras lumbringa,” Diretora Saldanha hateten, iha Dili.
Nia hatutan, aimoruk hirak ne’e fahe ba labarik sira ho idade tinan lima mai kraik atu prevene sira husi mal nutrisaun.
Nia hatutan, inan aman sira bele lori sira nia oan ba iha postu saude, sentru Servisu Integradu Saude Komunitaria (SISKA) no pesoal saude sira sei fahe tuir eskola sira.
Iha parte seluk, Inan husi estudante Filomena Fatima Lidia Araujo, hateten programa ida ne’e diak tebes, tanba bele proteze labarik sira husi moras hanesan mal nutrisaun no lumbringa.
Nia dehan, pesola saude sira vizita duni eskola infantile Farol fahe informasaun ba inan aman sira no fahe duni vitamina A no aimoruk lumbringa nian ba labarik sira iha eskola.
“Sim, ami simu duni aimoruk ne’e, fila ba uma hau fo ba hau nia oan hemu,liu loron tolu lumbringa hat mak sai duni no halo nia isin sai kmaan,” nia hateten.
Nia mos, husu ba Ministerio Saude atu fahe mos informasaun ba komunidades iha area rural, atu labarik sira iha area rural mos bele hetan no hemu aimoruk ne’e.
