Tribunal Munisipal Dili (TMD) hala’o julgamentu ba kazu krimi ofensas integridade simples ne’ebe involve arguida MK (bin) baku no tebe vitima AS (alin), tanba hadau malu uma.
Tuir akuzasaun Ministeriu Publiku ne’ebe lee sai husi juis prezidente, katak iha dia 13 fulan Agostu 2014 arguida mai husi Australia husu ba vitima haruka sira sai husi uma ne’ebe mak vitima hela ba, tanba uma ne’e uluk entrega ba arguida, durante iha diskusaun nia laran arguida sempre obriga vitima ho nia la’en oan husi sai husi uma ne’e.
Maibe iha altura ne’eba, vitima ho nia la’en nunka atu preokupa, tanba vitima hanoin nia mos iha direitu ba uma ne’e. Iha data 24 Agostu lokraik arguida ho nia la’en mai hasoru vitima hodi dehan “imi ba buka fatin seluk ona tanba hau atu hela iha uma ne’e” maibe vitima ho nia la’en nonok deit iha momentu ne’eba.
Tanba nervozu, arguida foti kadeira hodi tuda ba vitima no tuku tebe vitima iha kotuk laran, tanba sente asaun ne’ebe mak arguida halo ne’e hanesan krimi ida, entaun vitima ho nia la’en ba keixa iha polisia.
Hafoin lee sai akuzasaun ne’e, juis prezidente husu ba arguida atu hili koalia ou nonok maibe arguida hili koalia hodi dehan ba tribunal, katak vitima mos iha rai no uma antes ne’e, maibe vitima ba fa’an tiha depois ikus mai ba hela fali iha arguida nia uma.
“Ami nia direitu hanesan nia iha uma no rai maibe ba fa’an tiha depois ba hela fali iha hau nia uma durante hau iha Australia, ne’e mak halo hau nervozu,” arguida deklara iha tribunal.
Maibe nia dehan mesmu hanesan ne’e depois de arguida baku vitima, arguida mos arepende no bolu hikas vitima no koalia didiak, hodi vitima halo fali uma seluk iha rai rohan ne’ebe arguida oferese.
“Nia hau nia alin no ami nain rua mesak deit, la’os hau mak haree nia see tan, tanba ne’e hau buka solusaun ba probelam ne’e,” arguida dehan tan.
Hafoin rona tiha deklarasaun husi arguida, juis prezidente husu ba vitima atu presta mos nia deklarasaun, maibe iha momentu ne’eba vitima hili nonok hodi prova katak deklarasaun husi arguida ne’e los hotu.
Hafoin ne’e juis prezidente deside hodi fo pena suspensaun tinan ida ba arguida no husu ba arguida atu labele repete tan aktu hanesan, tanba asaun ne’e kategoria krima ida.
