Ministerio Saude koopera ho Organizasaun Saude Mundial (OSM) organiza workshop kona ba virus zika ho nia sintomas ba jornalistas nasional, nune’e informasaun ne’ebe sira hato’o ba publiku kona ba virus ne’e ho lolos.
Tuir Diretora Jeral de Prestasaun Saude, dotora Odete da Silva Viegas, katak media iha papel importante tebes hodi ajuda governu habelar informasaun ne’ebe loos ba komunidades kona ba virus foun ne’ebe afeta ba saude publiku.
“Ita bo’ot sira (media) nia prezensa importante tebes, atu ita iha preparasaun ida diak antes virus ne’e tama mai,” dotora Viegas hateten, iha Hotel Novo Turismo, Dili.
Maske virus ida ne’e seidauk tama mai, maibe nia dehan, presiza antisipa no husu ba ema hotu, liu-liu inan isin rua sira atu labele halo viajen ba nasaun afetadu, hanesan Indonezia, Thailandia, Brazil no seluk tan.
Nia hateten, virus ida ne’e perigu ba inan isin rua sira, tanba bainhira inan isin rua ida afeta virus ida ne’e bele kauza labarik moris ho ulun ki’ik no risku bo’ot mate.
“Hamoos ambiente no halo protesaun ba sira nia an rasik, tanba virus ida ne’e da’et liu husi susuk aedes agepthy ne’ebe hada’et mos moras dengue,” nia apela.
Entretantu, Reprezentante OSM, dotor Rajesh Pandav, hateten importante tebes jornalista sira iha konesementu uluk kona ba virus ne’e, nune’e bele habelar fali informasaun ba komunidades ho lolos.
Atu komunidades labele hakfodak no tauk, nia dehan, media sira iha papel importante tebes atu hato’o informasaun ne’ebe loos ba komunidades atu komprende no bele prevene aan.
“Tenke iha konesementu kona ba virus zika inklui halo prevensaun, liu –liu kontrolu ba iha fatin hirak ne’ebe susuk ele btolun ba, moras ida ne’e laiha nia tratamentu,” dotor Pandav hateten.
Iha parte seluk Jornalista Radio Liberdade, Maria Biebel, hateten workshop ne’e importante tebes atu jornalistas mos iha konesementu, nune’e bele habelar fali ba komunidades ho lolos.
Nia mos husu ba MS no OSM atu hametin nafatin koordenasaun servisu ho media sira.
“Hau nia sujestaun deit se bele tenke iha briefing ba jornalista sira kada fulan kona ba moras hirak ne’ebe eziste iha rai laran, atu jornalista mos iha konesementu,” nia sujere.
