Primeiru Ministru (PM), Dr. Rui Maria de Araujo, hateten durante lansamentu website foun kona ba fronteira maritima katak meius ida ne’e importante tebes tanba bele ajuda Timor-Leste hodi atinji fronteira maritima ida ne’ebe permanente.
Xefe governu hateten katak plataforma online komprensiva ne’e lansa ho objetivu, tanba “ne’e ami nia prioridade ida atu fo klaru kona ba ami nia fronteiras maritima no terestres tuir lei internasional ne’ebe iha.”
PM Araujo hatoo deklarasoens iha serimonia lansamentu website kona ba fronteira maritima Timor-Leste nian iha 29 Fevereiru 2016, iha Palacio Governu, Dili no hateten mos katak Timor-Leste hafahe area maritima ho Indonezia no Australia maibe ate agora seidauk estabelese fronteiras permanente ho nasaun rua ne’e.
PM haktuir tan katka atinji fronteira maritima permanente mak hanesan prioridade nasional Timor-Leste nian no hanesan faze final ida luta ba soberania no independensia nasional.
Entretantu Diretor Ezekutivu organizasaun Luta Hamutuk (LH) Mericio Akara, husu ba governu atu uza website ne’e hodi konvense governu Australia hodi rezolve problema fronteiras iha tasi Timor nian.
“Ekipa sira ne’ebe mak servisu iha portal ida ne’e, bele uza dadus sira ne’e hodi halo estrategia diak hodi konvense Australia koalia kona ba fronteira maritima,” Diretor LH Akara sujere.
Nia dehan tan katak lansamentu website foun ida ne’e hanesan pasu pozitivu ida atu komunidades bele asesu prossesu negosiasaun ho governu Australia no Indonesia liu husi portal ida ne’e kona ba fronteira tasi Timor nian.
