Membru Parlamentu (MP) Nasional, Deputadu Eladio Faculto, husu ba Ministerio Saude (MS) atu sosa fali gerador foun ba Ospital Nasional Guido Valadares (HNGV), tanba gerador rua ho kondisaun aat hotu.
Nia dehan, perigu tebes bainhira eletrisidade mate no HNGV laiha gerador pasientes bele mate, liu-liu pasiente sira ne’ebe iha sala operasaun no ICU.
“Tenke sosa gerador foun ida ba tau iha ne’eba, se la’e ahi mate operasaun lala’o no labarik sira prematru sei hetan problema bo’ot,” Deputado Faculto sujere, iha plenaria Parlamentu Nasional.
Nia hatutan, agora dadaun gerador iha HNGV aat hotu ona, entaun impresta fali gerador husi casa sivil prezidente hodi bele salva pasientes nia vida.
Alende ne’e, nia hateten, instalasaun bee moos iha HNGV mos sai problema bo’ot ,tanba sanyo sira ne’ebe uja ne’e antigu ona, presiza troka.
Iha parte seluk familia pasiente, Adriano Nascimento, sente triste bainhira haree situasaun ida ne’e, tanba tau pasiente iha risku bo’ot.
“Semana kotuk hau nia subrinho atu mate sala-salah, tanba nia moris depende ba iha oksigen bainhira elektrisidade mate tenke bomba,” nia kestiona.
Atual Vise Prezidente Parlamentu Nasional ne’e, husu ba Ministerio Saude atu responde emergensia ba problema ne’e, tanba HNGV presiza gerador foun atu fo atendementu ba pasiente.
“Orsamentu promulga ona haree hadia ona gerador aat ne’e ou sosa foun fali hodi salva ema nia vida,” nia hateten.
