Organizasaun Movimentu Feto Foinsa’e (MOFFE) hamutuk ho organizasaun international Maria Stope’s Timor –Leste (MSITL) hala’o edukasaun promosaun ba foinsa’e sira kona ba saude reprodutivu no seksual.
Diretora Ezekutivu MOFFE, Yasinta Lujina, hateten programa edukasaun sivika ne’e hala’o iha eskola ensino pre-primaria no sekundario sira iha munisipios Lautem, Covalima, Suai, Viquque no Regiaun Especial Oe-Cusse, tanba foinsa’e sira, liu-liu iha area rural sei menus konesementu kona ba ida ne’e.
“Ita tenke fasilita sira ho informasaun, tanba ho informasaun mak ema ida-idak bele halo reflesaun ba sira nia aan, tau iha neon, tetu no uza ba sira nia aan,” Diretora Lujina hateten, iha nia fatin Farol, Dili.
Nia hatutan, foinsa’e sira iha area rural presiza informasaun, nune’e bele konese sira nia funsaun orgaun reprodutivu atu labele uza sala.
Nia mos, husu ba familia atu fahe mos informasaun ba iha oan sira kona ba asuntu ne’e, tanba mundu ohin loron iha tentasaun oin-oin mak foinsa’e sira hasoru.
Entretantu Prezidente Komisaun F (saude, edukasaun, kultura, veteranus e igualdade jeneru), Deputadu Virgilio da Costa Hornai, hateten asuntu ida ne’e parte ida husi edukasaun e husu ba ministeriu kompetente tau asuntu ne’e iha kurikulum Nasional.
“To’o agora ita seidauk integra materia hirak ne’e tau iha kurikulum nasional,” Hornai preokupa.
Nia mos, husu ba instituisaun relevantes (Minsiterio Saude no Edukasaun) atu halo kampanha regular ba komunidades kona ba asuntu hirak ne’e, nune’e foinsa’e sira (idade reprodutivu) bele hatene.
“Realidade, kazal foun barak laiha konesementu ba informasaun sira ne’e, entaun la hatene atu halo espasu ba sira nia oan no falta mos konesementu oinsa uza kontrasepsaun,” nia hateten.
