Prezidente Komisaun Nasional Kontra Trabalho Infantil (KNTI), Aniceto Leto Soro, hateten komisaun aprova ona lista servisus perigu ba labarik sira nia dezenvolvementu, iha 22 servisus mak bandu sira atu labele halo.
Nia dehan, servisus ne’ebe labarik idade 18 mai kraik labele halo mak ; hanesan servisu peskas, agrikultura, konstrusaun, hi’it sasan todan liu 20kg ba mane no 15kg ba feto, uza kimiku, suru rai henek, fa’an alcohol, sigaru, DVD, fase kareta no seluk tan.
“Ita identifika servisus todan hamutuk 22 mak labarik idade 18 mai kraik labele halo, tanba konsidera servisus hirak ne’e perigo ba sira,” Prezidente KNTI Soro hateten, iha Dili.
Nia hatutan, iha tempu badak komisaun sei aprejenta lista ne’e no proposta dekretu lei trabalho infantil ba iha Konselho Ministru hodi hetan apresiasaun, antes implementa.
Tanba ne’e, nia hatutan, sei iha sansaun penal no administrative ba pesoal, grupos sira ne’ebe fo servisu ne’ebe konsidera perigu ba labarik sira tanba kontra ona lei.
Entretantu Diretora organizasaun Forum Komunikasaun Joventude (FKJ), Madalena da R. Pinto Baptista, hateten numeru labarik fase kareta komesa menus ona, maibe labarik fa’an aifuan, sigaru no sasan seluk iha dalan ninin sei as.
“Ami intervista ho labarik sira ne’e, barak mak dehan sira tenke halo atividades ne’e hodi ajuda familia,” nia hateten.
Labarik sira ne’ebe halo atividade iha dalan ninin ne’e, nia dehan, maioria la eskola maibe balun mos eskola sira hala’o atividade bainhira eskola sai.
