Diretor Jeral Ministerio Edukasaun, Antonino Pires, hateten profesores hamutuk nain 1180 iha teritorio tomak mak tuir teste diagnostiku.
Nia dehan, teste ne’e atu prova dominasaun profesores sira nian iha siensia no sukat abilidade profesores sira nian iha lingua, tanba ministerio fo formasaun barak ona ba profesores sira kona ba lingua Portugues.
“Teste diagnostiku ne’e ami halai liu ba iha lingua Portugues, tanba iha kurikulum ho lian Portugues, entaun profesores hotu tenke hanorin ho lian Portugues,” Diretor Jeral Pires iha knaar fatin, Vila Verde, Dili.
Nia hatutan, teste ida ne’e importante tebes atu prova ba publiku kona ba kapasidade profesores sira nian iha dominasaun lingua, tanba dala barak publiku kestiona profesores sira la hatene koalia lian Portugues.
“Profesores sira tuir ona formasaun lian Portugues, ne’ebe agora tempu atu hatudu,” nia dehan.
Nia hatutan, ministerio planea ona formasaun kona ba lian Portugues nafatin kontinua, tanba ne’e ho resultado teste ida ne’e sira bele sukat abilidade profesores no kontinua kapasita.
Iha parte seluk Prezidente Komisaun F (saude, edukasaun, kultura, veteranus no igualdade jeneru), Deputadu Virgilio da Costa Hornai, hateten teste ne’e nesesario tebes hodi prova abilidade profesores sira nian iha lingua Portugues.
“Ita atu hetan formadores ne’ebe kualidade, tenke halo teste avaliasaun, hodi haree sira nia meritu, kapasidade atu eduka estudantes sira,” nia hateten.
Nia hateten, ne’e pasu ida diak tebes atu fo fatin ba profesores sira ne’ebe iha kualidade no abilidade mak bele hanorin.
Entretantu profesor Agostu Mendes, hateten teste ne’e diak tebes, tanba husi teste ne’e bele prova sira nia abilidade no domina iha lingua Portugues.
“Sira husu ami hakerek karangan kona ba selebrasaun loron 28 de Novembru iha Tasi tolu no maneira hanorin iha klase iha lian Portugues,” nia hateten.
Nia mos husu ba ministerio tenke estabelese painel teste ne’ebe independente no tenke iha regulamentu ne’ebe rigorozu atu halao atu teste diagnostiku ida ne’e.
