Ministru Agrikultura e Pescas (MAP), Estanislau da Silva, hateten atu atende ba situasaun el nino ne’ebe akontese iha Timor, oras ne’e dadaun governu prepara ona fini no aihan balun ne’ebe sei oferese ba populasaun sira.
Nia hateten, MAP sei kolabora ho Ministeriu Estatal no Administrasaun, atu identifika komunidades iha sukus no aldeias ne’ebe mak presiza fini no aihan tanba kauza husi bailoro naruk iha tinan ne’e.
“Ami halo hela preparasaun antisipa kona ba fini no aihan ne’ebe sei oferese ba populasaun sira ne’ebe presiza,” Ministru da Silva hateten.
Bazea ba lei organika governu nian, ministeriu interior mak sei toma responsabilidade ba situasaun el nino nian hodi kria koordenasaun no kooperasaun ho ministeriu hotu-hotu inklui kanaliza ajudus ba komunidade sira.
“Ami sei koordena ho ministeriu interior oinsa mak bele intrega sasan sira ne’e ba komunidade sira,” nia hateten.
Iha parte seluk Deputadu Eladio Faculto, hateten situasaun el nino sai hanesan problema bo’ot iha Timor, tanba produsaun aihan ne’ebe menus, kapasidade produsaun mos foin mak organiza ida ne’e situasaun ne’ebe mak defisil tebes.
“Nia implikasaun ba animal, ba aihoris no ba ita ema, rai ne’ebe manas tebes, bee komesa menus, situasaun sira ne’e governu tenke haree,” Faculto hateten.
Situasaun el nino ne’ebe akontese agora, nia hateten, fo impaktu maka’as liu ba komunidade ne’ebe moris ho kbi’it la’ek, tanba ne’e presiza halo ona identifikasaun ho lalais hodi detekta ema sira ne’eebe presiza duni tulun.
“Ema sira ne’ebe moris aat los, ne’e governu tenke fo garantia ba sira, liu-liu kona ba bee moos no hahan saudavel,” nia hateten.
Alende n e’e, nia mos apela ba governu presiza organiza komunidade, atu kuda aihoris, tanba elnino akontese impaktu husi ta’a ai arbiru.
“Ta’a tia laiha hanoin atu kuda fali, presiza haree mos ba ida ne’e,” nia sujere.
