Membru Parlamentu Nasional (MP), Deputadu Virgilio Hornai da Costa, husu ba jovens sira atu forma sira nia grupu, nune’e bele hetan apoiu husi governu.
Nia dehan kestaun ne’e, tanba jovens barak mak laiha servisu, liu-liu sira ne’ebe la kontinua sira nia estudu hafoin akaba iha nivel sekundariu.
“Forma grupu hanesan hakiak animal ou bele mos grupu kona ba halo to’os nian,” Deputadu da Costa sujere, iha Parlamentu Nasional.
Nia hateten, ida ne’e hanesan parte ida atu hakbi’it joventude sira iha vida ekonomia.
Iha sorin seluk Sekretariu Jeral Comisaun Nasional Joventude Timor-Leste (CNJTL), Manecas Lobo dos Santos, hateten CNJTL servisu hamutuk ho governu liu Sekretariu Estadu Politika Formasaun Profesional e Empregu(SEPFOPE) loke formasaun ba jovens sira iha munisipiu hotu.
“Hau hanoin SEPFOPE loke tiha ona formasaun professional ba jovens sira iha munisipiu hotu no tenke aproveita oportunidade ne’ebe iha,” nia hateten.
Tanba ne’e, nia husu ba joventude sira,liu-liu iha area rural atu partisipa ativu iha formasaun professional ne’ebe governu fornese ona, nune’e bele compete ho sira seluk.
