Vise Ministru Finansas, Helder Lopes, hateten bazea ba rezultadu sensus uma kain ne’ebe halo iha tinan ne’e (2015) hatudu total populasaun pre-liminariu sa’e ba 1.167.242 pesoas kompara ho rezultadu sensus iha 2010 ho total populasaun 1.066.409.
Vise Ministru Lopes, hateten husi total populasaun hamutuk 1.167.242 kompostu husi mane nain 588,561, no feto nain 578,681.
“Sensus dala tolu ne’ebe mak ita halo ne’e, ita nia populasaun sempre aumenta, rezultadu sensus 2015 ne’e total populasaun sae ba 1.167.242. ne’e ita seiduak inklui ita nia ema sira ne’ebe hela iha rai liur,” Vise Lopes hateten, iha Hotel Timor, Dili.
Nia kompara, iha tinan 2010 total populasaun hamutuk 1.066.409, husi numeru ne’e total mane hamutuk nain 544,198, no feto hamutuk 522,211.
Nia mos informa, iha tinan 1980 total populasaun Timor-Leste hamutuk nain 555.350, iha 1990 hamutuk nain 747.557, nune’e mos iha tinan 2001 hamutuk 787,340, enkuantu iha tinan 2004 hamutuk nain 923,198.
Fator prinsipal populasaun kada tinan sempre aumenta, nia dehan, tanba numeru ema moris kada tinan aumenta ba bebeik.
Enkuantu Primeriu Ministru, Rui Maria de Araujo, apresia ho servisu Ministeriu finansas nian ne’ebe realize ona sensus populasaun, hodi komunidade hotu-hotu bele informadu kona ba total populasuan iha Timor.
“Sensus ne’e importante no ministeriu finansas iha kompromisiu atu halo sensus regular kada tinan lima,” nia hateten.
Atu hatene total populasaun iha Timor-Leste, nia dehan, lolos la’os deit liu husi mekanismu sensus, maibe bele uja mos maneira seluk, tanba iha Ministeriu Justisa nia okos iha ona logistika do nasimentu ne’ebe mak rekolha dadus populasaun nian.
Nune’e mos, nia dehan, iha Ministeiru Saude estabelese ona programa saude no familia ne’ebe mak nia orientasaun sei kolekta dadus familia no uma kain sira, tanba ne’e, nia dehan, nusa mak governu la uja dadus sira ne’e sai hanesan fonte atu hatene total populasaun iha Timor duka tenke hein kada tinan lima atu halo sensus.
“Ita pais ki’ik oan, populasuan mos ki’ik, se ita iha instrumentu seluk atu halo kontajen ba ita nia numeru populasaun, tanba saida mak ita tenke hein to’o sensus mak ita halo kontajen ba numeru populasuan,” PM Araujo kestiona.
Tanba ne’e, Primeiru Ministru Araujo , husu ba Diresaun Jeral Estatistika Ministeriu Finansas nian, atu tuur hamutuk ho Ministeriu Justisa no Ministeiru Saude hodi konsulida esforsu sira ne’e.
