Membru Parlamentu Nasional MP Deputadu Cesar Valente, husu ba governu liu husi Ministeriu Defeza (MD) atu kria kondisaun ba ofisiais Falintil Forsa Defeza Timor-Leste (F-FDTL) sira ne’ebe akaba ona formasaun iha rai liur.
Tanba tuir nia, durante ne’e governu haruka sira ba tuir formasaun iha rai liur, liu-liu kona ba aero nian iha Filipina, maibe depois fila mai, sira la halo buat ida.
“Iha tinan 2013 sira ba hasai kursu aero nian, agora fila mai tiha maibe la halo buat ida, tenke tau duni iha area ida ne’e, no governu tenke iha hanoin ona atu kria kondisaun,” Deputadu Valente fo hanoin, iha Parlamentu Nasional.
Iha tempu governu anterior, nia hateten, konsege haruka mos membru balun ba tuir formasaun kona ba korpus ofisiais nian, maibe wainhira sira fila ba tau fali iha logistiku. Lolos governu tenke iha politika ne’ebe diak atu hadia ona kestaun ne’e.
“Pelu menus tinan ida rua nia implementa lai materia no esperiensia ne’ebe mak nia hetan durante iha formasaun, mak koloka fali ba fatin seluk,” nia sujere.
Hatan ba preokupasaun ne’e Ministeriu Defeza (MD), Cirilio Cristovao, rekonese kestaun ne’e no governu Timor –Leste halo ona apromsimasaun ho Tentara Nasional Indonesia (TNI) atu oferese aviaun ba ofisiais sira ne’ebe mak foin lalais akaba ona sira nia formasaun hodi trenu.
“Ami koalia ona ho nasaun Indonezia atu oferese sira nia aviaun, atu formandu sira ne’e bele refresh fali saida mak sira aprende ona,” Ministru Cristovao hateten.
Nia informa, ministeriu hahu trasa planu hodi sosa helikopru rasik, tanba instituisaun F-FDTL iha ona hanoin atu loke Unidade Aero nian.
