Membru Parlamentu Nasional (PN), Deputadu Cesar Valente, hateten droga fasil tama iha Timor-Leste, tanba seguransa iha fronteiras (terrestre) fraku tebes.
Tuir nia,operasaun polisia nian seiduak kobre fatin sira hotu iha fronteiras, entaun dala ruma ema balun utiliza frakeza ida ne’e hodi hatama droga mai rai laran.
“Fronteira ne’e luan tebes, tanba ne’e iha dalan le’et sira balun polisia laiha, entaun ema tama ho fasil,” Deputadu Valente hateten, iha Parlamentu Nasional.
Tanba ne’e, nia sujere, ba Komando Jeral Polisia Nasional Timor-Leste (PNTL) atu estabelese operasaun espesifiku hodi buka tuir rede droga sira iha rai laran.
“Durante ne’e sira ladun spesifiku atu buka tuir kestaun sira ne’ebe mak proivido,” nia hateten.
Hatan ba kestaun ne’e Komandante Servisu Investigasaun Kriminal (SIK), Inspektor Xefe Ludgerio Lay, rekonese kestaun ne’e, e buat hirak ne’e akontese tanba menus rekursus humanus.
“Droga ne’e barak liu tama husi fronteira, tanba ita iha frakeza barak,” Komandante Lay hateten.
Maibe, nia dehan, SIK sei koopera ho Falintil-Forsa Defeza Timor-Leste (F-FDTL) liu husi operasaun Zota 2 no Servisu Nasional Informasaun (SNI) husi parte PNTL nian, hodi kombate droga iha rai laran.
“Ami tenta buka tuir ema sira ne’e, nune’e ba future ita bele limita kestaun sira ne’e,” nia hateten.
Nia dehan, kada tinan SIK sempre kaer kriminozu sira ne’ebe mak hatama droga mai no halo transaksaun iha Timor, kuaze 6% ema mak PNTL kaptura ona.
