Segundu Sargentu Julia da Costa, membru Falintil Forsa Defeza Timor –Leste (F-FDTL) mak hanesan feto (militar) internasional ne’ebe primeira vez hasai estudu iha academia militar Japaun nian.
Nia hateten, durante tinan 58 nia laran (akademia ne’e harii) laiha feto forsa husi nasaun seluk mak tama iha academia militar Japaun, e Timor –Leste mak hanesan nasaun primieru ne’ebe haruka feto militar hasai estudu iha academia ne’e.
“Laiha feto husi rai seluk mak tama iha ne’eba, feto iha duni maibe feto militar husi rai laran deit, entaun hau mak hanesan feto internasional primeiru tama iha akademi militar Japaun nian no agora iha feto rua husi nasaun Mongolia no Filipina,” Sargentu Costa hateten, hafoin hasoru malu ho Sekretaria Estado Apoiu Promosaun Sosio Ekonomia da Mulher, iha salaun Ministerio Defeza, Fatuhada, Dili.
Nia hatutan, feto ladun tama iha academia militar Japaun, tanba prosesu selesaun rigorozu tebes, kandidatu tenke hatene koalia no komprende diak lingua Japaun nian inklui kriteria seluk ne’ebe kandidatu presiza preenxe.
Durante tinan hat hala’o estudu iha academia militar Japaun, nia dehan, nia aprende buat barak kona ba servisu militar nian no Information Technology (IT), tanba nia foti espesialidade ba IT nian.
Nia hatutan, apoiu familia importante tebes ba susesu hotu ne’ebe nia hetan, tanba iha membru feto nain rua seluk ne’ebe la konsege remata iha academia tanba laiha apoiu husi familia.
Iha parte seluk Sekretaria Estado Apoiu Promosaun Sosio Ekonomia da Mulher (SEM), Veneranda Lemos Martins, enkoraja feto membru F-FDTL sira atu motiva no esforsu aan hodi partisipa iha prosesu hotu, tanba lei fo dalan no iha oportunidade barak ba feto.
“Orgulho bo’ot ba ita, tanba academia militar Japaun feto Timor –Leste mak loke dalan ba feto sira husi nasaun seluk atu tama,” SE Lemos orgulhu.
Entretantu Xefe Rekursus Humanus Instituisaun F-FDTL, Kapitaun Rui Soares, hateten laiha diskriminasaun ba membru F-FDTL sira tanba oportunidade loke ba ema hotu depende ba kapasidade ema ida-idak nian.
“Iha oportunidade ba sira atu tama iha academia militar, maibe iha balun la konsege remata tanba laiha apoiu husi familia no parseirus,” nia hateten.
