Koordenador Rede ba Rai,, Roberto Aleixo da Cruz, hateten problema rai sei sai konflito social iha Timor-Leste, tanba lei rai nian to’o agora seidauk iha.
Tanba tuir nia, bainhira atu halo dezenvolvementu ruma, governu ba foti rai komunidade nian sein iha baze legal.
“Hakarak ga lakohi, fiar e la fiar, lalais ga kleur, problema rai ne’e sai konflito social bo’ot iha Timor,” Koordenador Rede ba Rai Cruz hateten, iha Farol, Dili.
Iha lei inan Konstituisaun Republika Demokratika Timor-Leste (RDTL), hatuur ona katak bainhira foti rai komunidade nian, governu tenke selu indeminizasaun ba sira ho justu.
“Iha Oe-Cusse, rai balun governu la selu kompensasaun, ne’e bazea ba saida,” nia kestiona.
Iha tinan 2012, nia dehan, Parlamentu Nasional aprova tiha lei ne’e, maibe Prezidente Republika (iha momentu ne’eba), Ramos Horta, veto tiha, e lei ne’e agora kaduka tiha ona no entrega fali ba Ministeriu Justisa atu diskute.
Nia hatutan, lei ne’e diskute tiha ona iha Konselho Ministru (KM) e agora dadaun iha hela Prezidente Zona Ekonomia Espesial no Sosial Merkadu (ZEESM) hodi estuda lei ne’e antes haruka ba PN.
Entretantu Deputadu Duarte Nunes, hateten atu aprova lei rai ne’e presiza tempu, tanba tenke diskuti ho klean.
“Ita tenke diskute fila fali lei ne’e ho didiak,” Deputadu Nunes hateten.
