Membru Parlamentu (MP) Nasional, Deputadu Eladio Faculto, hateten Prezidente Parlamentu Nasional no governu tenke iha ona planu kongreta atu estabelese edifisiu foun Parlamentu Nasional, tanba ida agora ne’e la favorese ona.
Faculto hateten, Parlamentu Nasional (PN) nia volume servisu kada tinan aumenta ba bebeik, enkuantu fatin ne’ebe iha komesa klo’ot ona.
“Parlamentu Nasional labele kontinua ho situasaun sira hanesan ne’e, agora dadaun ne’e komisaun sira ne’e mesak uja coby house hotu,” Deputadu Faculto kestiona, iha Parlamentu Nasional.
Nia dehan, la’os atu halo edifisiu ida ne’ebe mak previlijiadu liu ou luxu, maibe pelu menus bele akumula hotu movimentu servisu parlamentu nian.
Tanba, nia dehan, dala ruma membru governu mai halo surumutu nivel komisaun nian, fatin la to’o balun tuur iha liur, ne’e ladun diak.
Nia hatutan, iha terseira legislasaun ekipa Parlamentu Nasional koordena ona ho Asembleia Republika Portugal atu halo estudu viabilidade kona ba edifisiu foun PN nian, maibe to’o agora laiha rezultadu.
Hatan ba preokupasaun ne’e Vise Prezidente PN, Deputadu Aderito Hugo, hateten agora dadaun governu disponibiliza hela fatin iha Bairo-Pite (eis Lanud) atu sai fatin proprio Parlamentu nian iha futuru.
“Besik ho palasio prezidente kedas ne’e atu sai hanesan future instalasaun parlamentu nasional nian, agora prosesu la’o hela,” Prezidente Hugo hateten.
Nia dehan, kona ba dezenu konstruksaun ne’e Parlamentu Nasional Timor-Leste halo ona kooperasaun ho Asembleia da Republika Portugal hodi fornese idea oinsa mak bele harii edifisu ne’ebe mak kualidade no bele akumula hotu unidades hotu.
“Bele akomoda nesesidade Parlamentu Nasional iha longu prazu, ita lakohi atu halo tiha depois tanba volume servisu barak liu edifisu la to’o, tenke halo tan,” Vise Prezidente ne’e hateten.
Nia dehan, agora dadaun prosesu sira ne’e la’o hela, bainhira dezenu ne’e prontu ona governu sei aloka orsamentu hodi komesa konstrusaun.
