Komandante Unidade Polisia Maritima (UPM), Linho Saldanha, hateten Komando Polisia Nasional Timor –Leste (PNTL) aloka orsamentu $225 mil hodi halo manutensaun ba roo hamutuk 17 ne’ebe durante ne’e paradu.
Komandante Saldanha, hateten roo 17 ne’e durante tinan 3 ona la halo operasaun iha tasi laran, tanba aat.
“Ita bele halo ona manutensaun ba roo sira ne’e, tanba hetan apoiu orsamentu husi komando,” Komandante Saldanha hateten, iha Dili.
Kona ba kompanha ne’ebe mak sei kaer ba obra manutensaun ne’e, nia dehan, agora dadaun prosesu aprovizionamentu la’o hela.
“Prosesu aprovizionamentu la’o hela ba kompania ne’ebe hetan fiar hodi hadia roo sira ne’e,” nia hateten.
Nia promete, roo hirak ne’e bele ona funsiona hodi halo operasaun antes tinan oin mai.
Tanba, nia dehan, durante ne’e roo rua deit mak halo operasaun iha tasi laran, enkuantu roo sira seluk paradu hela.
Iha parte seluk Deputada Ilda Maria da Conceicao, rekonese roo hirak ne’e durante ne’e paradu hela, tanba ne’e nesesariu duni atu komando tau matan.
“Ita nia tasi Timor ne’e presiza proteze, roo sira ne’e tenke hetan manutensaun rutina, nune’e bele halo operasaun iha tasi laran,” Deputada Conceicao hateten.
Nia dehan, lolos kada tinan governu presiza prepara osan ba manutensaun roo sira ne’e.
“Roo sira ne’e labele paradu tinan barak hanesan ne’e, ne’e ladiak,” nia dehan.
