Membru Parlamentu Nasional, Deputada Ana Ribeiro, husu ba Ministeriu Obras Publiku,Transporte e Komunikasaun (MOPTK), atu hadia estrada iha postu administrativu Bauguia, munisipiu Baucau ho urjenti, tanba aat los.
Tanba tuir nia, estrada Bauguia grave teb-tebes no fo impaktu liu-liu ba feto ho kondisaun gravida liu husi estrada ne’e.
“Inan feto sira ne’ebe mak isin rua sai vitima tebes, tenke hadia ho urjente,” Deputada Ribeiro sujere, iha Parlamentu Nasional.
Alende ne’e, nia dehan, wainhira iha tempu udan, bee nakonu iha estrada kuak no rezultra komunidade ne’ebe uza motor hetan asidente.
“Tempu udan hanesan fali pisinha, entaun ba sira ne’ebe lori motor sempre hetan dezastre,” nia hateten.
Tanba ne’e, dala ida nia husu ba MOPTK (karik seiduak bele hadia iha tempu badak), atu ateiru tiha nune’e bele fasilita komunidades hala’o sira nia atividades.
Hatan ba preokupasaun ne’e, Ministru Obras Publiku, Gastao de Sousa, rekonese kestaun ne’e no agora dadaun governu esforsu hela oinsa bele rezolve.
“Prosesu agora la’o hela,” Ministru Sousa hateten.
Kona ba hadia ho urjente, nia dehan, presiza halo nia prosesu.
