Prezidente Konselho Ezekutivu Asosiasaun Defisientes Timor –Leste (ADTL), Joaquim Freitas dos Santos, sujere atu estatutu Konselho Nasional ba ema Defisientes (KND) ne’ebe atu harii ne’e tenke independente.
Tanba tuir nia, kuandu konselho ne’e submete iha ministerio relevantes nia okos, entaun fasil atu politiza no susar atu foti desizaun ruma ba nesesidade ema defisentes nian.
“Diak liu konselho ne’e harii independente para labele iha influensia politika, atu nune’e bele halo servisu diak liu,” Santos sujere via telefone.
Tanba tuir nia, kuandu konselho ne’e indepedente, mak sei hetan fundus husi orsamentu jeral do estado kada tinan hodi hala’o programa no atividades promove direitu defisiente sira nian.
Estabelesementu konselho ne’e, nia dehan, importante tebes atu halo advokasia ba iha ministerio relevantes hodi halo programa no planu orsamentu ba dezenvolvimentu,liu-liu konsidera mos ema ho defisensia sira nia ideias.
Iha parte seluk, Xefe Departamentu Defisente e Idozos Ministerio Solidaridade Sosial (MSS), Mateus da Silva, hateten ministerio forma ona ekipa hodi halo analiza ba informasaun hotu hafoin aprezenta ba iha Konselho Ministru.
“Iha konsultasaun publika maioria partisipantes konkorda konselho ne’e tenke independente, ne’ebe ita presiza halo analiza ba informasaun sira ne’e,” nia hateten.
Tuir planu, nia hateten, konselho ida ne’e sei estabelese iha tinan ida ne’e hodi tau matan espesifiku ba direitu ema ho defisensia iha rai laran.
