Tribunal Munisipal Dili (TMD) hala’o julgamentu ba kazu ofensas integridade simples ho forma violensia domestika (artigu 145 kodigu penal), ne’ebe Ministeriu Publiku notifika arguida ZB baku AT tanba deit buka pastadente la hetan.
Tuir akuzasaun husi Ministeriu Publiku (MP) ne’ebe lee sai husi Juis Prezidente, Francisca Cabral, katak iha fulan Fevereiru 2012, tuku lima lokraik iha Taibesi, wainhira lezada AT fila husi servisu arguida ZB buka hela pastadente ho hirus-hirus no aumenta ho liafuan mal balun ne’ebe mak lezada senti ladun diak.
Iha momentu ne’eba lezada AT hateten ba arguida atu buka pastadente ho nonok deit, la presiza hirus, tanba liafuan ne’e karik ladun diak ba arguida, entaun arguida tama ba kuartu hodi koalia hasoru lezada, tanba liafaun la kona malu hodi rezulta arguida rasta lezada nia fuuk no tebe lezada monu ba rai no basa lezada iha hasan to’o matan bubu.
Hafoin lee sai akuzasaun hirak ne’e, juis prezidente husu ba arguida hili koalia ou nonok, maibe arguida hili atu nonok hodi prova katak akuzasaun hirak ne’e los hotu.
Wainhira juis husu ba lezada atu hili nonok ou kolia, lezada hili atu kolia hodi presta deklarasaun ba tribunal katak, agora dadaun arguida no lezada diak malu ona, maibe agora lezada hela ketak ona iha koz no la hela hamutuk ona ho arguida.
“Mana husu diskulpa ona ho hau no ami diak malu ona,” lezada AT deklara.
Hafoin rona tiha deklarasaun husi lezada tribunal tetu ho justifikasaun hirak ne’e, hodi fo pena suspensaun tinan ida ba arguida, sei wainhira arguida halo tan hahalok krimi ruma konserteza arguida tama deretamente ba prizaun preventiva.
