Membru Parlamentu Nasional, Deputadu Manuel Castro, hateten makina hasai raisis nian iha Ospital Referal Baucau avaria durante tinan ida resin ona, maibe to’o agora seidauk hadia.
Tanba ne’e, nia husu ba Ministeriu Saude (MS) atu hadia tiha makina ne’e, tanba durante tinan ida ne’e la fo atendementu ba pasientes.
“Makina raisis tinan ida ho balun ona ladiak ,entaun sira ne’ebe hakarak hasai raisis tenke halai mai Dili, ami husu responsabilidade ministerio saude atu haree h urgente,” Deputadu Castro ejiji, iha Parlamentu Nasional.
Nia hatutan, kada tinan Parlamentu Nasional aloka osan ba Ministerio Saude hodi rezolve problema sira ne’e, atu labele prejudika atendimentu ba komunidade sira, maibe realidade laiha rezultadu.
Iha parte seluk, Diretor Ospital Referral Baucau, Eugenio Soares, rekonese kestaun ne’e no kleur ona la halo atendementu ba pasientes ne’ebe presiza hasai raisis.
Nia dehan, problema ne’e hato’o ona ba iha Ministerio Saude atu rezolve, maibe to’o ohin loron seidauk rezolve tanba ne’e seidauk halo atendementu.
“Hau hato’o ona ba iha Ministerio Saude, maibe ate agora seidauk,” Soares dehan.
