Sekretariado Estado Meiu Ambiente (SEMA) preve $500 mil husi Orsamentu Jeral do Estado (OJE) 2015 atu halo lafaek nia fatin (luhan) iha distritu tolu.
Sekretario Estadu Nominando Soares Martins Buras, hateten iha 2014 la konsege halo konstrusaun ba luhan lafaek nian, tanba demora iha dezeno no Bill Of Quantity (BOQ).
“Agora prosesu hotu ona no tau osan 500 mil dolares atu halo konstrusaun lafaek nia luhan iha Hera, Viquque, Lospalos no distritu Same,” SE Buras hateten, iha Parlamentu Nasional.
Fo uluk prioridade ba municipio tolu ne’e, tanba nia dehan, tuir survey ne’ebe halo hatudu katak iha fatin hirak ne’e mak dalabarak lafaek tata ema.
Osan ida ne’e la’os deit halo konstrusaun lafaek nia fatin, maibe nia hateten, sei haree mos ba bens servisu nian hodi garantia sustentabilidade programa lafaek nian.
Iha parte seluk, Membru Parlamentu Nasional, Aurelio Freitas Ribeiro, preokupa tanba iha OJE 2014 Parlamentu Nasional aprova ona osan atu halo sosializasaun inklui halo lafaek nia fatin.
“Ne’ebe ami hakarak hatene progresu atu halo jestaun ba lafaek nian, tanba lafaek kontinua tata populasaun,” Deputadu Ribeiro kestiona.
Entretantu, Komunidade Jeremias da Silva, hateten ne’e hanoin ne’ebe pozitivu tebes hodi rekolha lafaek sira ne’ebe durante ne’e tata ema.
Atu kaer lafaek sira ne’e, nia dehan, presiza kolaborasaun no komunikasaun ne’ebe diak ho lia nain sira iha distritus, nune’e hanoin sira ne’e realiza ho susesu.
“Hau hanoin alende dook husi komunidades, bele mos sai fatin turismu ba turista sira ne’ebe iha interese atu haree,” nia dehan.
“Maibe presiza komunikasaun ne’ebe diak ho lia nain sira, tanba ita nia fiar, lafaek ne’e ita nia avo.”
