Organizasaun Rede Feto Timor –Leste sujere ba governu atu Orsamentu Jeral do Estado (OJE) ano fiskal 2015 ne’e tenke investe barak liu iha setor ne’ebe produtivu hanesan agrikultura, peskas inklui mos turism, nune’e bele fo retornu ne’ebe diak ba estado no hadia mos ekonomia familia nian.
Governu tenke hanoin ona atu investe iha setor produtivu sira, hanesan meus ida atu bele subtitui ba iha setor petroliferu, nune’e nia dehan, kada tinan labele depende deit ba osan fundu petroleum nian.
“Ami sujere atu orsamentu jeral do estado tinan 2015 labele habokur deit makina estado maibe investe iha setor produtivu sira hanesan dalan alternative hodi subtitui fundu petroliferu ne’ebe kada tinan hasai,” Prezidente Board Rede Feto, Ivete Oliveira bainhira partisipa diskusaun orsamentu iha Parlamentu Nasional.
Nia hatutan, setor ida ne’e alende fo retornu mos ba estado hadia mos ekonomia populasaun nian no garantia alimentasaun aihan ne’ebe ho kualidade ba komunidade sira.
Iha parte seluk, Membru Parlamentu Nasional, Deputada Angelica da Costa, preokupa ho planu orsamentu 2015 ne’ebe governu aprezenta kontinua fo prioridade ba setor infra-estruktura la fo importansia ba iha setor produtivu sira ne’ebe fo benefisio direita ba povu nia moris diak.
“Dezenvolvementu la signifika ita harii uma andar bo’ot halo auto estrada, kareta marka foun maibe dezenvolvementu tenke refleta iha kondisaun moris povu nian,” Deputada da Costa hateten.
Nia hatutan, iha tinan hitu ikus ne’e governu gasta ona osan ho montante $6,2 biloens ba iha infra-estruktura maibe la hatudu rezultado ne’ebe diak ba povu.
Entretantu Primeiru Ministru, Kay Rala Xanana Gusmão, hateten orsamentu jeral tinan 2015 iha prioridade hat ne’ebe sei fo atensaun hanesan politika fiscal ne’ebe sustentavel ba mediu no longu prazu, kresimentu ekonomia ne’ebe sustentavel fo duni benefisio ba Timor oan hotu, inklui mos infra-estruktura.
“Ita tenke investe iha infra-estruktura ne’ebe ho kualidade hodi tane kresimentu ekonomia, ajuda prestasaun servisu no dudu dezenvolvimentu seitor produtivus hotu,” PM Gusmao hateten, iha abertura diskusaun orsamentu 2015 iha Parlamentu Nasional.
Nia hatutan, estado mos iha obrigasaun atu proteje no fo atensaun ba Timor oan sira ne’ebe labele hetan benefisio direitu husi kresimentu ekonomia rasik.
