Membru Parlamentu Nasional, Deputada Anastacia da Costa Amaral, hateten 85% komunidades iha area rural seidauk iha konesementu kona ba pulsa elektronik ne’ebe Eletrisidade Demokratika Timor –Leste (EDTL) distribui.
Deputada ne’e, hateten pulsa elektrik ne’ebe EDTL fa’an, komunidade iha area rural barak mak seidauk iha konesementu.
“Sira la komprende saida mak sira tenke halo no hakerek iha pulsa nia laran,” Deputada Amaral hateten, iha plenaria Parlamentu Nasional.
Tanba ne’e, nia husu ba governu antes atu fa’an pulsa ne’e, tenke halo sosializasaun uluk ba komunidade nune’e bele iha konesementu.
“Ba komunidade nia le’et hodi esplika oinsa atu uja pulsa elektronik ne’e,” nia sujere.
Hatan ba preokupasuan ne’e Diretor Jeral EDTL Nasional, Virgilio F. Guterres, nia parte rejeita informasaun ida ne’e, tanba antes atu monta prepago iha komunidade sira nia uma, ekipa teknik EDTL sei esplika oinsa atu ense pulsa elektronik ne’e.
“Teknikamente ami espika ba sira, kona ba uja pulsa elektronik ne’e, hahu iha inisiu 2014,” Diretor Guterres hateten.
Iha fatin seluk komunidade Maria Fernandes, hateten iha Dili laran ema barak mak seiduak uja pulsa elektronik, tanba la kompre maneira uja pulsa refere.
“Hau atu uja, maibe hau seiduak hatene atu uja oinsa?,” Fernandes dehan.
