Estudantes Eskola Ensino Basiku Filial 28 Novembro Bubulale tinan ida resin ona hala’o prosesu aprendizajen iha sede suku Irabinde Cima, distritu Viqueques.
Professores Gabriel Pinto, hateten eskola ne’e (iha sede suku) loke iha dia 07 Dezembro tinan 2013 maibe hahu hala’o aprendizajen iha dia 06 fulan Janeiru tinan 2014, total estudantes nain 44.
“Ami loke eskola ne’e tanba labarik sira husi Bubulale ba eskola iha suku Bahatata Uaiboru-naha’a ne’ebe hakat liu tan mota bo’ot rua: mota Uaiboru-naha’a ho mota Uai-ka’ate,” Profesor Pinto hateten, isub-distrito Uato-Carbau, distritu Viqueque.
Ho razaun ida ne’e, nia dehan, estudantes nia inan aman ejiji ba Diretor Ensino Basika Sentral 28 Novembro Afaloikai, Martinho Lopes hodi loke eskola ne’e.
“Udan ona mota bo’ot rua ne’e liu la diak, tanba laiha ponte labarik sira la tuir aprendizajen tan ne’e mak husi estudante nia inan aman rasik mak ejisi ba professores sira hodi loke eskola ne’e,” nia hateten.
Tenik Professores katak, total estudante ne’ebe hamutuk 44 pessoas ne’e fahe ba aula tolu I, II, III ne’e ba tinan 2014 nian, maibe ba tinan 2015 sei aumenta tan aula ida hamutuk aula haat husi I, II, III, ho IV anos.
Eskola ne’e hetan ona ajuda husi eskola ensino basico central 28 Novembro Afaloikai hanesan meja, kadeira inklui merenda eskolar.
Iha parte seluk Jestor Programa Timor-Leste Coalition of Education (TLCE), Matias dos Santos, konsidera ida ne’e moe ida ba governu, tanba sede suku la’os eskola.
“Ne’e moe bo’ot ba ita, se estudante sira uja tiha sede suku, entaun membrus da suku ba servisu fali iha ne’ebe,” Jestor TLCE Santos preokupa.
Tanba ne’e, nia husu ba Ministeriu Edukasaun atu haree kestaun ne’e no buka oinsa para rezolve tiha.
Iha fatin seluk Diretor Jeral do Servisos Corpotivos ME, Antoninho Pires, hateten presiza haree uluk estatuta eskola ne’e, privadu ga publiku, se publiku entaun hein desizaun husi ministru edukasaun.
“Ami sei identifika sira nia estatuto hodi hadia, tanba tinan ida ne’e ami iha planu halo uma eskola ba estudante sira ne’ebe seidauk iha uma eskola inkui laiha meja ho kadeiras,” Diretor Jeral Pires hateten.
