Iha Orsamentu Jeral Estadu (OJE) 2015, Ministeriu Justisa (MJ)nian ne’ebe ho montante $26,320 milions sei fo prioridade ba formasaun judisiariu.
Vise Ministru Justisa, Ivo Jorge Valente, hateten orsamentu $26.320 milions sei foti $1.080 millaun husi fundu dezenvolvementu kapital umanu hodi fo formasaun ba prokuradores, juises, advogadus, defensoria publiku no notariadu sira.
Tuir planu, nia dehan, sei loke vagas formasaun ba majestarus hamutuk nain 45, advogadu 30, notariadu 12 ate 15.
“Barak liu iha area kapasitasaun rekursu umanu, oinsa halo timor oan matenek iha area justisa,” Ministru Valente hateten, iha nia knar fatin,Colmera,Dili.
Nia hateten, iha tinan kotuk (2014) Sentru Formasaun Judisiariu konsege gradua juis nain 11, defensoria publik 11 no prokurador 12.
“Sira ne’e desktaka ona iha tribunal no iha ministeriu publiku ona,” Vise Ministru Valente hateten.
Nia hateten kada tinan kandidatu majestradu sira barak mai halo rejistu iha sentru formasaun, no sentru sei halo selesaun ba kandidatus ne’ebe kaulifikadu mak bele tuir formasaun.
Entretantu Deputadu Aurelio Ribeiro hateten durante ne’e MJ sempre produs formandu judisiariu sira, maibe sira uja ne’ebe kualidade.
Nia hateten, kada tinan formandu ne’ebe kualidade ne’e ho numeru kiik, antaun kada tinan sempre loke formasaun ba majestradu sira.
“Ita atu hetan ema kualidade ne’e mos la’os fasil,” nia dehan.
Maibe, tuir nia, Timor –Leste nia sistema justisa ne’e avansadu oituan, tanba bele estabelese sentru formasaun judisial ne’e.
