Ministerio Saude estabelese ekipa nasional ida atu halo sosializasaun informasaun ba komunidade capital Dili kona ba prevensaun ba moras dengue tanba kontribuisaun komunidade nian importante tebes atu kombate dengue.
Responsavel Unidade Moras Dengue Ministerio Saude, Frederico Bosco Alves do Santos, hateten ministerio iha ona programa lubuk ida atu halo intervensaun ba moras dengue ne’ebe tinan –tinan hamate labarik lubun ida.
“Hahu udan monu rai ita kria kedas ekipa nasional ida halo sosializasaun edukasaun prevensaun ba iha komunidade sira, ita mos fahe aimoruk abate ba iha uma kain sira no rega uma kain sira ne’ebe detekta ona iha dengue atu bele hamate susuk ne’ebe provoka dengue,” doutor Santos hateten via telephone.
Nia informa, iha Janeiru 2015 registu kazu ida ,maibe iha fin Dezembru 2014 registu kazu hamutuk nain 10, numeru ne’ebe iha nain hat mak la salva no seluk konsege rekopera.
Nia hatutan, kazu sira ne’ebe relata husi Distritu Dili tanba ne’e nia husu ba iha komunidade sira kontribui promove moris mos atu bele prevene moras dengue.
Iha parte seluk, Membru Komisaun F (saude, edukasaun, igualidade, veteranus), Deputadu Eladio Faculto, hateten atu kombate moras dengue tenke resolve uluk problema lexu tanba lexu mak hakiak susuk hodi provoka moras dengue.
“Atu kombate ou redus numeru dengue iha rai laran primeiru tenke resolve uluk problema lexu iha sidade laran liu –liu sentru komersial sira ne’ebe soe lexu arbiru deit kria susuk ne’ebe provoka dengue,” nia dehan.
Entretantu Ministru Administrasaun Estatal (MAE), Jorge da Conçeicao, Teme hateten atu resolve problema lixu la’os fasil, maibe ministerio halo esforsu tomak atu bele resolve tanba liga ho ema nia konsensia.
Nia hatutan, iha tinan kotuk ministerio aloka osan ba iha sukus sira iha capital laran atu halo limpeza maibe meus ida ne’e la efetivu tanba falta kontribuisaun husi komunidade kontinua soe foer arbiru iha baleta.
“Tinan ida ne’e ami hanoin atu halo kontratu ho kompania balun atu limpeza iha area sira ne’ebe diresaun saneamentu labele kobre,” Teme hateten.
