Membru Parlamentu Nasional ejiji ba governu atu rekolha taxa husi trabalhador estrangeirus ne’ebe hala’o servisu iha Timor –Leste atu kontribui ba dezenvolvimentu.
Deputadu Osorio Florindo, hateten receitas domestiku kada tinan ki’ik, tanba governu laiha sistema ida ne’ebe diak atu rekolha mos taxa husi ema estrangeirus ne’ebe halo servisu iha Timor –Leste.
Nia hatutan, lolos ema estrangeirus ne’ebe servisu iha rai laran ne’e tenke selu taxa ba governu, la’os selu deit viza.
“Buat ki’ik oan ne’ebe fasil governu la konsege kobre ne’e mak ita kestiona, tanba ema estrangeirus servisu iha rai laran barak,” Deputadu Florindo kestiona, iha Parlamentu Nasional.
Nia hatutan, atu hasa’e receita domestiku hodi subtitui ba iha receita petroliferu, governu tenke foti desizaun atu halo kobransa mos ba ema estrangeirus sira ne’ebe servisu iha rai laran.
Alende ne’e, nia dehan, governu mos tenke halo kobransa ba trabalhador Timor oan sira ne’ebe haruka ba servisu iha rai liur, tanba governu investe osan bo’ot mos ba sira.
Hatan ba kestaun ne’e, Vise Primeiru Ministru, Fernando Lasama de Araujo, rekonese faktus sira ne’ebe membru parlamentu sira aprezenta no husu atu fo hanoin malu nafatin hodi haree asuntu ida ne’e.
Nia hatutan, presiza haree fila fali lei sira ne’ebe iha liu –liu lei impostu atu halo kobransa impostu mos labele hatodan fali parte balun, liu –liu povu.
“Buat ne’e la’o hasoru malu hela kuandu ita kobre taxa bo’ot ita tenke selu sira mos ho osan bo’ot, entaun presiza haree didiak,” Lasama hateten.
