Estudantes sira preokupa maka’as kona ba profesores sira ne’ebe hanorin iha fatin rua, tanba sempre abandona sira, liu-liu iha prosesu aprendiazajen nian.
Estudantes Antonio da Costa, konsidera Ministerio Edukasaun mak failha kontrola professores (funsiunario publiku) sira hodi hanorin iha fatin rua.
“Kuandu orario hanesan (jadwal tabrakan),mestre fo hela deit livru haruka ami hakerek, nia ba hanorin fali eskola seluk,” da Costa kestiona, iha Dili.
Nia dehan, profesores sira ne’e abandona aula, tanba ba hanorin fali iha eskola privadu.
Tanba ne’e, nia dehan, Ministerio Edukasaun tenke iha planu rigorozu hodi kontrolu professores sira, tanba kada tinan estado hasai osan bo’ot hodi selu sira.
Situasaun ida ne’e mak, nia dehan, fo impaktu ba sira hanesan estudantes, liu-liu bainhira ezame sira la hatene, liu –liu disiplina sira hanesan matematika, fisika, kimika no seluk tan.
Membru Komisaun F (saude, edukasaun, kultura, veteranus no igualidade jeneru), Deputadu Eladio Faculto, husu ba ME tenke kontrola ida ne’e, tanba ne’e falta kontrolu husi ministeriu nian.
“Bolu atensaun ba diretores eskola sira atu haree situasaun ida ne’e, nune’e professore sira labele halo servisu dobru, se hakarak sai funsionario publiku labele sai tan funsionario swasta,” nia sujere.
Hatan ba kestaun ne’e, Ministerio Edukasaun, Bendito Freitas, rekonese kestaun ne’e, maibe agora dadaun ministerio halo hela avaliasaun ba professores iha teritorio tomak.
“Professores sira ne’ebe hanorin fatin rua ne’e tenke hola sansaun ba sira,” Ministru Freitas hateten.
