Ministeriu Saude seidauk iha baze legal ida hodi regula aimoruk hirak ne’ebe komunidade sira fa’an arbiru iha kios sira durante ne’e.
Diretor Nasional Apoiu Servisu Hospitalar e Encaminhamentu, Ministerio Saude, Horacio Sarmento da Costa, hateten ohin loron seidauk bele kontrola aimoruk antibiotika sira ne’ebe faan ona iha kios bairo-bairo, tanba seidauk iha lei.
“Kuandu lei ne’e iha ona, ita komesa regula ona se mak bele fa’an aimoruk, items saida mak bele fa’an iha lojas no apotik,” Diretor da Costa hateten, iha Kaikoli, Dili.
Kestaun ne’e sai mos preokupasaun ministerio nian, tanba ne’e, nia dehan,dadaun ne’e sira halo ona diskusaun atu elabora lei farmasia nian hodi bele regula aimoruk sira ne’ebe sirkula iha Timor laran.
Nia hatutan, sira mos halo hela konsultasaun ho Ministerio Komersio Industria e Ambeinte (MKIA) atu bele haree ba asuntu ida ne’e (lisensa negosio).
Iha parte seluk, Prezidente Komisaun F (saude, edukasaun, kultura, veteranus no igualdade jeneru), Deputadu Virgilio da Costa Hornai, preokupa tebes ho sitausaun ida ne’e no MS tenke kontrola sirkulasaun aimoruk iha rai laran.
“Tanba ema ne’ebe fa’an kios laiha konesementu ba dosis aimoruk antibiotika ne’ebe sira fa’an,no bele afeta ba ema nia saude,” Deputadu Hornai kestiona.
Tanba ne’e nia husu Ministerio Saude(MS) tenke konvoka sorumutu ruma entre linha ministerial sira ne’ebe relevante hodi diskute kona ba asuntu ida ne’e, iha baze legal ruma hodi regula sirkulasaun aimoruk.
Entretantu Gaspar da Silva, nudar komunidade nia sente presiza duni governu regula aimoruk antibiotika ne’ebe fa’an iha kios sira durante ne’e.
“Hau haree iha kios ki’ik balun iha bairo laran ne’e fa’an aimoruk antibiotika (parasetamol, amoxicilin, no seluk tan no pior liu labarik ki’ik sira mak fa’an sira la hatene aimoruk nia dosis ne’e hira, sira faan deit,” nia preokupa.
Nia haktuir, aimoruk balun presiza fatin ne’ebe diak liu –liu malirin atu garantia aimoruk nia kualidade, maibe iha kios ki’ik sira aimoruk tau arbiru deit.
