Reprejentante labarik distritu Ermera, Ivonia Martins konsidera programa merenda eskolar ne’ebe Ministerio Edukasaun implementa ne’e la higiene, tanba kondisaun dapur la favoravel atu tein no rai hahan.
Nia haktuir, kondisaun dapur ne’ebe la favoravel lalar barak hobur hahan sira ne’e entaun bele lori moras ba labarik sira.
“Hau hanoin merenda eskolar ne’e la iha higene tanba ami hare bina kanuru sira mos soe arbiru foti fali hodi suru etu fahe ba alunus sira han,” Martins dehan, bainhira hala’o diskusaun ho membru governu iha salaun Ministerio Solidaridade Sosial Vila verde, Dili.
Nia hateten, Ministerio Edukasaun tenke kria kondisaun ne’ebe favoravel ba kozineira sira atu bele prepara aihan ne’ebe saudavel no higiene ba labarik sira nune’e labarik sira labele hetan moras bainhira han hahan merenda iha eskola.
Iha parte seluk, Jestor Programa Timor –Leste Coalition for Education (TLCE), Matias dos Santos, sujere ba Ministerio Edukasaun no Ministeriu Suade presiza fo formasaun kona ba oinsa prepara aihan ne’ebe saudavel no higiene.
Tanba tuir nia, atu atinji objetivu merenda eskolar nian tenke fo nutrisaun diak ba labarik sira presiza kontrola didiak produtu sira ne’ebe uza ba merenda escolar.
“Tenke fahe modelu tein aihan ne’ebe diak no higiene ba labarik sira ba kozineiru sira, tanba ami observa iha eskola balun sira tein dadaun hahan fuma mos sigaru,” Matias kestiona.
Entretantu, Vise Ministra Edukasaun Ensino Baziku, Dulce de Jesus Soares, hateten ministerio fo ona formasaun ba iha kozineirus no fornesedor sira kona ba oinsa prepara aihan ne’ebe saudavel no higiene ba labarik sira no sei kontinua nafatin.
“Ami sei kontinua fo formasaun nafatin ba kozineirus sira inklui mos fornesedor aihan sira atu bele garantia aihan sira ne’e iha hinege no saudavel,” Vice Ministra Soares hateten.
