Bankada partidus politiku tolu CNRT, PD no FRETILIN ne’ebe eziste iha Parlamentu Nasional apoiu desizaun xefe governu nian atu halo remodelasaun ba estruktura V governu konstitusional, tanba membrus governu barak liu sira nia servisu la efetivu.
Membru Partidu Conselhu Nasional Rekonstrusaun de Timor (CNRT), Deputadu Arão Noel de Jesus Amaral, hateten remodelasaun lolos akontese iha tinan kotuk, maibe adia tanba iha asuntu importante seluk ne’ebe tenke fo prioridade.
Nia hatutan, planu remodelasaun ne’e sei akontese iha fulan Febreiru loron 18 tinan ida ne’e, atu asegura servisu atendimentu ba povu efetivu liu tan.
“Tanba barak demais iha miskomunikasaun entre sira, servisu bele lao arbiru deit, diak liu estrukturas ki’ik, ema ida-idak hatene nia servisu, sei efetivu liu no lori antendementu diak ba povu,” Deputadu Amaral hateten, iha Parlamentu Nasional.
Nia hatutan, remodelasaun ne’e bele resolve mos problema birokrasia ne’ebe durante ne’e ema hotu kestiona iha instituisaun estado nian.
Kona ba karik sei iha impaktu ba ezekuasaun Orsamentu Jeral Estadu (OJE) 2015, nia dehan, sei la fo impaktu tanba diretores no tekniku sira mak ezekuta osan, la’os ministru.
Iha parte seluk, Bankada Partido Demokratiku (PD), Deputadu Adriano do Nascimento, fo konfiansa tomak ba xefe governu atu halo remodelasaun ba membrus governu, karik ida ne’e diak ba povu nia moris.
“Partido la halo intervensaun, ne’e kompetensia tomak xefe governu nian atu eskolha membrus governu ne’ebe sai no tama, tanba xefe governu mak hatene liu nia membru ida ne’ebe iha kapasidade no laiha kapasidade,” Deputadu Nascimento hateten.
Nia dehan, forma governu atu responde ba povu nia nesesidade, “ la’os ita atu fahe kadeira ba malu,”.
Entretantu Sekretario Jeral partido Fretelin, Deputada Josefa Alvares Pereira Soares, hateten tenke halo duni remodelasaun, atu servisu bele efetivu liu tan tanba struktura bo’ot liu servisu la lao.
“Populasaun ne’ebe mais 1 milaun ho membru governante 50 resin ne’e, hau hanoin demais liu, bo’ot demais,” Deputada Soares hateten.
Iha nasaun dezenvolvidu sira, nia dehan, bainhira membru governu ida komportamentu ladiak tenke demite, tanba ne’e possible tebes ba Timor –Leste atu halo ida ne’e hodi bele lori dezenvolvementu ba povu sira.
