Negosiantes iha merkadu Taibesi lamentavel no konsidera governu halo diskriminasaun ba sira, tanba la muda negosiantes ne’ebe dadaun ne’e fa’an iha eis merkadu Comoro.
Negosiante Martinho Fernandes ne’ebe antes ne’e fa’an iha merkadu Hali laran, hateten governu halo ona diskriminasaun ba sira.
“Ami konsidera governu halo diskriminasaun, tanba la muda sira iha eis merkadu Comoro,” negosiante Fernandes kestiona, iha Dili.
Tuir lolos, nia dehan, sira iha eis merkadu Comoro ne’e mak muda uluk, tanba iha kedas dalan protokol, enkuantu Hali laran do’ok liu husi estrada boot “ne’ebe bainaka ruma husi nasaun liur mai mos la hetan ami ida, depois fatin mos la diak,”.
Kona ba kestaun ida ne’e, Diretor Luta Hamutuk (LH), Mericio Akara, dehan aproximasaun ne’ebe governu halo ne’e mak sala.
“Aproximasaun ne’e mak la humanu, se ita hakarak simu ita nia bainaka husi liur no lakohi moe tanba povu barak sei kiak, tenke fasilita sira kedas kria kondisaun ne’ebe diak,” nia dehan.
Nia dehan, merkadu Taibesi fatin la sufsiente duni atu akumula hotu negosiantes, “Administrador distritu Dili koalia mak barak, maibe la halo asaun,” nia dehan.
Tuir nia, governu duni negosiantes hanesan animal ida husik iha nia luhan, sein kria kondisaun ba sira.
Iha sorin seluk Negosiante eis Mercado Comoro, Dulce de Jesus, hateten sira uluk muda tiha ona ba merkadu Manleu, maibe fatin mak laiha.
“Entaun ami tun hotu mai fa’an iha ne’e, se ami la fa’an iha ne’e ami hetan osan husi ne’ebe,” nia hateten.
Nia dehan, nia prontu muda fali ba merkadu Manleu bainhira governu prepara fatin ne’ebe diak ba sira, nune’e sira bele fa’an ho kontente.
