Governo Timor-Leste liu hosi Sekretaria Estado Promosaun Setor Privado no Heineken Azia Pasific asina akordo investimento formal ida ne’ebe sei haree ba establesemento ba fabrika bebidas oioin iha rai laran.
Establesimento fabrika ba multi-bebidas Heineken sei oferese serviso ba 1000 Timor oan. Konstrusaun fabrika ne sei komesa iha tempo badak no espera sei remata iha fulan Maio 2015. Fabrika multi-bebidas sei produs hemu oioin hanesan serveza, soft-drinks no be.
Visi primeiro Ministru Fernando Lasama de Araujo hateten katak hafoin asina kontrato wainhira Timor-Leste dezenvolve planu dezenvolvemetno estratejiko 2011-2030, realizasaun katak sustentablidade ekonomi nasaun nian sei depende ba setor privado.
Vise PM de Araujo fiar katak liu hosi investimento industri bebidas ne’ebe Heineken halo iha Timor-Leste no establese fabrika hemu oioin sei fo serviso ba joven Timoroan barak ne’ebe sei dezemprego iha rai laran.
“Akordo ne’ebe ami asina ho compania Heineken estipula katak compania ne sei fo serviso ba joven sira.”
Presidente Heineken Azia Pasifiku Rejional, Roland Pirmez, hateten Heineken sei investa iha industria bebidas no estabelese fabrika produsaun tua iha Timor-Leste. Nia hatutan katak Timor-Leste iha sustentabilidade populasaun ne’ebe a’as no kresimento ekonomia no nia iha konfiansa katak ida ne’e investimento ne’ebe diak ba Heineken. Heineken plano atu investa US$40 millaun iha Timor.
“Ami sei serviso ho Timoroan. Timor-Leste hatudu katak nia bele atrai investador rai liur atu mai investe iha Timor,” President Pirmez hateten hafoin asina kontrato ho governo Timor-Leste iha Ministerio Negosio Estranjeiro no kooperasaun iha Pantai Kelapa, Dili, iha 08 Janeiro 2015.
Tuir plano fabrika Heineken sei harii iha Hera, iha cidade Dili ninin no sei hahu halao operasaun iha fulan Maio 2015.
Entertanto Sekretario Estado SEAPRI Veneranda Lemos hateten kompanhia ne sei rekruta joven Timoroan nebe dezempregadu atu tuir formasaun uluk atu nune’e sira pronto atu serviso iha industria bebidas.
“Ami sei fó treinamento ba sira antes sira komesa serviso,” SE Lemos hateten.
Emprezario Timor-oan lokal Nilton Gusmao Santos dehan investemento Heineken iha Timor-Leste hanesan pasu positivu ida atu minimiza numero dezemprego iha rai laran
“Heineken iha komitmento atu fo serviso ba Timoroan liuliu joven sira nune’e ida ne’e positivu tebes,” Santos hateten.
