Rezultado peskiza Sentru Estudu Jeneru Universidade Nasional Timor Lorosa’e (UNTL) hatudu, katak numeru estudantes feto abandona aula iha tempu prosesu aprendizajen la’o hela, tanba kauza husi eskola falta haris fatin.
Diretor Ezekutivu SEJ-UNTL, Gil da Costa, hateten peskiza ne’ebe sira halo ba eskola ensino sekundario no universitario sira iha capital Dili, atu hatene kauza husi feto barak abandona aula.
“Husu ba Ministerio no ADN atu dezenvolve BOQ ruma tenke inklui mos hariis fatin, tanba eskola barak mak laiha haris fatin, ne’e prejudika tebes estudantes feto sira,”Diretor SEJ-UNTL, da Costa hateten, iha Dili.
Nia hateten, dezenu konstrusaun eskola ne’ebe durante ne’e Ministeriu Edukasaun no Ajensia Dezenvolvementu Nasional (AND) halo la sensivel ba jeneru, tanba Bill of Quantity (BOQ) ne’ebe sira dezenvolve harii uma deit la inklui haris fatin no kanalizasaun bee moos.
Nia hatutan, problema ida ne’e bele kauza labarik feto sira abandona aula ikus mai repete klase to’o sai husi eskola, tanba moe.
Iha parte seluk, Membru Parlamentu Nasional, Deputada Josefa Alvares Pereira Soares, preokupa ho situasaun ida ne’e, tanba iha eskola barak tantu iha area rural no urbana barak mak laiha haris fatin ne’ebe apropriadu la halo separasaun ba haris fatin feto no mane.
Tanba tuir nia, eskola balun estudante sira tantu feto no mane uza harii fatin ida deit no odamatan ladiak, ne’e risku bo’ot tebes bele akontese buat ruma ne’ebe la espera.
“Governu tenke haree kestaun ida ne’e, estudantes mane bele buka espasu hodi soe bee, maibe ba feto sira tenke buka fatin ne’ebe adekuadu, konserteza fila ba uma ou komunidade sira nia uma ne’ebe besik eskola,” nia dehan.
Entertantu Sekretaria Estado ba Promosaun Igualidade (SEPI), Idelta Maria Rodrigues, rekonese katak setor edukasaun iha problema barak; hanesan falta karteiras, biblioteka, distansia eskola ne’ebe do’ok, professores la to’o no kondisaun eskola la premite.
“Presiza halo advokasia maka’as atu ministerio relevante sira bele haree asuntu ida ne’e,” nia sujere.
