Rede edukasaun Timor-Leste Coalition for Education (TLCE) konsidera Ministeriu Edukasaun (ME) falha kontrola programa merenda eskolar iha eskola ensino baziku, ne’ebe hamosu moras ba labarik estudante sira.
Tuir Jestor Programa TLCE, Matias dos Santos, katak merenda eskolar ne’ebe Ministeriu Edukasaun (ME) aloka ba eskola hotu-hotu iha 13 distritus, TLCE halo monitorizasaun ba eskola ensino baziku neebe infrenta hela programa merenda eskolar.
“Kazu labarik sira lanu ne’e akontese dala tolu ona, ne’e failansu ministeriu edukasaun nian hodi kontrola,” Jestor TLCE Santos, hateten, iha Kaikoli, Dili.
Nia dehan, kazu estudante lanu foin dadaun akontese tan iha eskola Ensino Baziku 30 de Agostu Comoro Dili, no antes ne’e iha Baucau, Laga no tinan kotuk iha Lautem.
Maske nune’e, nia dehan, Ministeriu Edukasaun seidauk halo kontrola nafatin ba merenda eskolar, tanba kazu ne’e kuaze hanesan deit no tuir observasaun TLCE, katak falta de kontrolu husi ministeriu.
Nia hateten, kuzineira sira presiza organiza didiak, tanba dala barak sira duni deit tempu, atu merenda eskolar implementa lalais, entaun sira hola modo iha fatin ne’ebe la seguru no sosa sasan ne’ebe liu ona prazu.
Alem de ne’e, nia dehan, TLCE mos kestiona eskola balun fos ne’ebe uja ba merenda eskolar laiha kualidade, tanba metan hotu ona.
Tanba ne’e, TLCE sujere ba ME troka tiha menu merenda eskolar ne’ebe loron-loron han etu ho konsumu aifuan sira ne’ebe iha nutrisaun diak, hanesan fore mungu, susu been, paun no aihan sira seluk .
“Duke sira loron-loron konsumu hahan ne’ebe laiha kualidade no na’an manu (ayam potong) ne’ebe deskunfia domina ho kimiku, halo labarik sira hetan moras fali,” nia dehan
Iha parte seluk Prezidente Komisaun F (saude, edukasaun, kultura, veteranus no igualdade jeneru), Deputadu Virgilio da Costa Hornai, hateten merenda eskolar uluk eskola ida-idak mak kaer rasik maibe laiha problemas.
“Sira rasik mak tein ita la rona buat ruma,” nia dehan.
Agora, nia dehan, grupu husi inan aman sira mak tein sai problema bo’ot, hanesan foin dadauk akontese iha eskola EB 30 de Agostu, Dili, Laga no iha distritu Lautem ikan lanu fali labarik estudante sira.
“Mestri sira tenke tau matan hahan sira ne’e,” nia sujere.
Entretantu Vise Ministra Ensino Baziku, Dulce de Jesus Soares, rejeita deklarasaun TLCE ne’ebe dehan ME falha, e la’os funsiunariu ministeriu nian mak implementa.
“Ministeriu servisu hamutuk ho fornesedor sira ne’ebe kompostu husi inan aman sira ou grupu feto ne’ebe mak eziti iha area eskola nian, sira mak sai fornesedor,” nia dehan.
Kona ba kazu iha eskola Ensino Baziku 30 de Agostu, nia hateten, ME sei fo formasaun ba kuzineiru sira iha Novembro-Dezembro 2014.
Kona ba fos merenda eskolar ne’ebe laiha kualidade, nia dehan, ministeriu seidauk simu keixa kona ba ida ne’e.
