Komisaun Inkeritu Parlamentar (KIP) tun ba baze halo verifikasaun ba projetu emergensia iha distritu lima, tanba deskonfia Sekretariadu Estadu Obras Publiku viola lei aprovizionamentu.
Prezidente Komisaun Inkeritu Parlamentar, Inacio Moreira, hateten komisaun ne’e foin forma nia estrutura iha fulan kotuk liu ba, agora tama ona iha faze kalendarizasaun, tun ba halo verifikasaun.
Nia dehan, Parlamentu Nasional kria komisaun ida ne’e tanba Sekretaritadu Estadu Obras Publiku (SEOP) fo orden trabalho ba kompania hodi halo obra iha distritu lima (Viqueque, Lospalos, Same, Cova-Lima no Manatuto) ho karakter emergensia.
“Maibe laiha kontratu, laiha Bill Of Quantity (BOQ) no dezenu,” Prezidente KIP Deputadu Moreira, hateten iha Parlamentu Nasional.
Maibe, kona ba servisu no data komisaun inkeritu parlamentar ba iha baze, nia dehan, sei la publika ba publiku, tanba iha baze legal ne’ebe regula kona ba ida ne’e.
“Tanba iha lei juridiku inkeritu parlamentar ne’e proibi ida ne’e,” nia dehan.
Iha parte seluk Deputadu Aurelio Freitas Ribeiro, hateten maioria deputadu/a sira konkorda KIP tun ba halo fiskalizasaun ba implementasaun projetu emergensia ne’ebe durante ne’e la’o hela iha distritu lima.
“Sekretriu Estadu Obras Publiku hola inisiativa rasik haruka kompania halo obra ho karakter emergensia, maibe laiha orsamentu, latama iha orsamentu jeral estadu nian,” nia dehan.
Alem de ne’e, nia dehan, tanba governu la kontrola, entaun projetu hirak ne’e laiha kualidade.
Entretantu Sekretariu Estadu Obras Publiku (SEOP), Luis Vaz Rodrigues, rejeita fo komentariu kona ba asuntu ne’e.
“Hau sei la kolia kona ba ida ne’e,” SE Rodrigues no comment.
