Membru Parlamentu Nasional preokupa maka’as governu muda negosiantes ne’ebe fa’an nuu no ikan iha tasi ibun Lecidere uja forsa.
Deputadu Eladio Faculto, hateten muda negosiante labele ho forsa, tanba povu mos hakarak buka sira nia moris.
“Tenke muda ho etika, loron ida hau visita negosiante nuu iha tasi ibun mak sira hato’o keixa mai hau dehan governu tun ba muda sira ho forsa deit,” Deputadu Faculto hateten, iha Parlamentu Nasional.
“Tenke muda sira ba fatin diak, para labele halo triste, tanba sira fa’an hodi sustenta sira nia vida moris loron-loron nian,”.
Preokupasaun hanesan hato’o mos husi Xefe Suku Santa Cruz, Manuel Coreia, katak governu muda tiha negosiantes sira maibe la kria kondisaun ba sira.
“Realidade ita nia negosiante iha merkado Taibesi tuur iha rai rahun laran fa’an sira nia sasan, depois muda tan negosiante husi Hali laran ba fatin laiha,” nia kestiona.
Tanba ne’e nia husu ba governu, kria kondisaun ne’ebe diak, nune’e negosiante sira sente kontente fa’an iha fatin ne’ebe governu tau sira ba.
“Violasaun la’os baku ema mak viola, maibe tratamentu povu la dignu nee mak ita bolu violasaun direitu humanus,” nia hateten.
Iha parte seluk negosiante Lorenco de Jesus ne’ebe loron-loron fa’an nuu iha tasi ibun Lecidere ne’e, hateten ekipa patrolu husi saneamentu distritu Dili mai ho forsa, dehan labele fa’an iha estrada ninin.
Se ami la fa’an, hetan osan husi ne’ebe hodi sustenta familia uma laran,” nia dehan.
“Ami fa’an iha merkadu mos ema la sosa, tanba buat hotu kompletu ona iha ne’eba.”
