Governu sei muda komunidade ne’ebe hela iha eis Merkado Comoro, tanba fatin ne’e sei uja hodi harii dormitorio (asrama) ba Polisia Nasional Timor-Leste (PNTL) distrito Dili nian.
Administrador Distrito Dili, Gaspar Soares, hateten ne’e rai estadu nian, bainhira deit estadu presiza atu halo dezenvolvementu, komunidade tenke hamamuk fatin ne’e.
“Ami planu ona fatin ne’e atu harii dormitorio ba Polisia Nasional Timor Leste, tanba Komandante Distrito Dili hasoru tiha ona hau,” Administrador Soares hateten, ihaDili.
Kona ba negosiantes ne’ebe to’o agora sei fa’an iha fatin ne’eba, tenke sai hotu iha merkadu Manleuana, tanba governu halo luan tiha ona fatin ne’eba.
Iha sorin seluk Deputada Albina Marcal Freitas, hateten ne’e tama iha planu orsamental tinan 2015 nian e instituisaun no ministeriu ida-idak inklui mos PNTL iha orsamentu jeral do estadu.
“Importante tenke haree, se karik ita nia komunidade sira mak okupa iha laran, entaun ho mekanismu saida mak muda sira sai husi fatin ne’eba,” Deputada Marcal hateten.
Entretantu Sekretario Estado Seguransa (SES), Francisco da Costa Guterres, hateten prosesu ba planu ida ne’e agora la’o hela.
“Ami sei halo uma atus ida ba membrus PNTL sira iha fatin ne’eba, tanba polisia iha Dili laran barak liu,” SE Guterres hateten.
Nia dehan, prosesu dezenu halo tiha ona,maibe tanba rai ne’e luan no uma mos barak, entaun tekniku sira tenke hadia fali dezenu ne’ebe iha.
“Quartel Dili ne’e la’os quartel bai-bain, la hanesan quartel geral agora ne’e, tenke diferente oituan, sei dezenu hotu lais, tinan id ane’e bele hahu halo ona no tenke halo uma bo’ot para bele akomoda iha laran,” nia dehan.
Kona ba orsamentu nia dehan, sei prosesu hela.
