Membru Parlamentu Nasional konsidera sidadaun ne’ebe iha kartaun eleitoral rua, ne’e krime tanba bele falsifika informasaun no dokumentus ho intensaun hetan benefisiu oi-oin.
Deputado Antoninho Bianco, hateten ida ne’e krime bo’ot ida, maibe durante ne’e laiha ema ida mak atu kesar aktu ida ne’e nune’e bele prosesa tuir lei ne’ebe iha.
Atu kontrola ida ne’e , nia dehan, ema hotu nia responsabilidade laos deit STAE tanba STAE produs kartaun bazeia ba rekezitus balun hanesan sertidaun batismu, sertidaun RDTL ne’ebe husi igreja no ministerio justisa.
“Ne’e krime no ema hotu iha responsabilidade atu kontrola kona ba ida ne’e,” Deputadu Bianco hateten, iha Parlamentu Nasional.
Nia hatutan,baze de dadus sei problema bo’ot pior liu tan bainhira halo pagamentu ba iha Idozu komesa mosu kazu oioin tanba ne’e sistema tenke diak no kontrola ne’ebe rigoruzu liu tan husi lideransa komunitaria sira.
Iha parte seluk, Diretor Jeral STAE, Aquilino Manuel Branco, rekonese katak iha ema ida rua mak kaer kartaun rua no balun oras ne’e dadaun prosesa ona iha Ministerio Publiku.
Tuir nia, problema hirak ne’e mosu, tanba sistema baze de dadus ne’ebe iha manual deit, entaun ema bele registu dala rua ho naran no hela fatin ne’ebe la hanesan.
“Ita nia baze dadus detekta los iha duni leitores ida rua mak kaer kartaun rua tanba resensiamentu ne’ebe ita halo ne’e ita registu manual deit,” nia dehan.
Alem de ne’e nia dehan, sira mos detekta iha eleitores balun halo deklarasaun falsu, katak kartaun lakon, entaun STAE iha obrigasaun produs kartaun, tanba sira lori ho deklarasaun kartaun lakon husi parte polisia, iha balun mos halo sken hodi hasa’e idade atu hetan subsidio idozu nian bainhira pagamentu identifika.
Atu kombate aktu ida ne’e, nia dehan, STAE oras ne’e dadaun dezenvolve hela sistema resensiamentu online, maibe seidauk implementa tanba problema linha internet seidauk iha no area rural la asesu.
Tanba ne’e nia husu ba sidadaun sira ne’ebe iha kartaun rua bele ba entrega fali ida iha STAE hodi halo verifikasaun.
