Organizasuan Non Govermental (NGO) Haburas lamenta ho governu ne’ebe durante ne’e laiha planu no programa ne’ebe diak atu promove ekoturismu rai laran.
Xefe Devisaun Advokasia no Peskiza Haburas, Roberto Aleivo da Cruz, hateten wainhira governu iha serimonia ruma ou hadia jardin ruma tenke lori aifunan hosi rai liur.
“Aifunan mai husi Bali, hanesan hiasan lafahek mos sosa husi rai liur, buat sira ita iha, maibe la uja no promove,” Da Cruz kestiona, iha Faro, Dili.
Durante ne’e nia dehan, governu halo grupu kooperativa barak atu haburas no modifika ekoturismu rai laran sai furak no kualidade maibe governu laiha hanoin atu promove.
Tan ne’e nia sujere ba Sekretariadu Estadu Kooperativa, atu koopera ho ministeriu hotu-hotu nune’e kaundu iha seremonia ruma bele uja ekotorismu rai laran nian.
“Lolos ne’e rekomenda atu wainhira iha seremonia ruma uja ita nia aifunan rai laran atu promove saida mak ita iha,” nia sujere.
Hatan ba ida ne’e Sekretariu Estadu Kooperativa, Filipe Nino Pereirra, hateten durante ne’e govenu mos halo ona esforsu lubuk ida ona, atu promove ita nia produtu sira iha rai laran liu husi aktividade feiras.
“Feiras ne’e halo Iha nivel nasional no internasional,” dehan Secretariu Estadu Pereirra, iha nia knar fatin.
Nia rekonese, katak saida mak NGO nasional sira levanta ne’e iha duni nia faktus, tanba ne’e Sekretariadu Estadu Kooperativa sei esforsu nafatin hodi kontinua fo hanoin ba membrus governu sira seluk hodi uja produtu balun ne’ebe Timor iha, “Ho objetivu atu hadomi ita nia produtu,” SE Perreira hateten.
