Koordenadora Uma Mahon Forum Komunikasi Perempuan Timor Lorosa’e (FOKUPERS), Judith Ribeiro, hateten oras ne’e dadaun labarik minoridade nain 17 hela ho inan iha uma mahon.
Nia haktuir, labarik sira ne’e sai vitima indireita husi krime violensia domestika ne’ebe akontese iha sira nia familia laran tanba sira inosente maibe sira tenke simu realidade ida ne’e.
“Iha ami nia shelter agora iha vitima nain 23 no labarik hamutuk nain 17, labarik sira ne’e tuir sira nia inan ne’ebe sai vitima ba violensia domestika,” Koordenadora Ribeiro hateten, iha Ministerio Solidaridade Sosial,Dili.
Nia hatutan, labarik sira ne’e maioria ho idade ne’ebe presiza duni domin husi inan sira tanba iha balun sei susu susu been inan nian.
Iha parte seluk, Koordenador Programa Asistensia ba Moras Mental iha Recoperasaun do Dezenvolvimentu ba Trauma no Pysico-sosial Timor Lorosa’e (PRADET), Anibal Idalino Leo, hateten ema ne’ebe vitima direita no indireita husi violensia domestika no seksual, risku bo’ot atu sofre moras mental tanba trauma sira ne’e implika ba sira nia mental.
Nia hatutan,governu tenke kria politika ida atu hakotu violensia domestika no violensia bazea ba jeneru iha rai laran, tanba violensia sira ne’e implika ba iha dezenvolvimentu jerasaun foun sira iha futuru.
“Labarik sira ne’ebe sai vitima direita no indireita ba violensia domestika iha trauma sira sei tauk mane hotu-hotu hadook an husi sosiedade situasaun sira ne’e implika ona ba sira nia mental,” nia dehan.
Entretantu Prezidente Grupu Feto Parlamentar Timor –Leste (GMPTL), Deputada Josefa Alvares Pereira Soares, preokupa ho asuntu ida ne’e tanba fo impaktu ba labarik sira nia dezenvolvimentu.
Deputada ne’e mos husu ba orgaun kompotente sira liu –liu Ministerio Solidaridade Social no Ministerio Edukasaun atu fo atensaun ba labarik sira ne’e atu sira labele lakon sira nia direitu asesu ba edukasaun.
“Governu mos tenke iha ona uma mahon ida atu fo asistensia psikologika, medika, moral, juridika inklui mos asistensia social ba vitima sira ne’e labele NGO deit,” nia dehan.
