Setor saude iha Timor –Leste oras ne’e dadaun sei menus pesoal psikiatria atu halo tratamentu ba komunidade ho problema mental.
Prezidente Komisaun F (saude, edukasaun, kultura, veteranus e igualidade jeneru), Deputadu Virgilio da Costa Hornai, hateten Timor –Leste seidauk iha mediku espesialista ne’ebe barak ba area psikologia, enkuantu komunidade barak mos ho defisiensia mental ne’ebe presiza tratamentu espesifiku.
Nia dehan, governu iha obrigasaun atu tau iha planu hodi forma rekursu humanu iha area espesifiku sira ne’e tanba labele hein deit orgaunizasaun non governmental sira.
“Tenke integra ona iha politika ministerio nian atu haree asuntu ida ne’e, nune’e bele fo tratamentu ba komunidade sira ne’ebe mai ho problema mental,” Deputadu Hornai hateten, iha Parlamentu Nasional, Dili.
Iha parte seluk, Koordenador Programa Asistensia ba Moras Mental Psycoterapia Rekoperasaun do Dezenvolvementu ba Trauma (PRADET), Anibal Idalino, hateten durante ne’e sira hetan apoiu husi mediku espesialista psikiatria Portugal ida ho Timor oan ida tanba Timor –Leste seidauk iha rekursu ne’ebe sufsente ba area ida ne’e.
“Emfermeiru psikiatria hau bele dehan ita laiha doutor, foin iha ida mantein iha ospital nasional, e pesoal sira ne’ebe durante ne’e halo tratamentu ba ema ho defisiensia mental durante ne’e bazeia ba esperiensia deit,”nia hateten.
Nia hatutan, iha distritu governu tau ona medikus geral sira ne’ebe trienado atu fo atendimentu ba ema ho moras mental tuir matadalan tratamentu ne’ebe ministerio saude iha ona.
Alende ne’e Koordenadora Uma Mahon Forum Komunikasi Perempuan Timor Lorosa’e (FOKUPERS), Judit Ribeiro, hateten durante ne’e fo asistensia konseling ba vitima violensia seksual, violensia domestika no seluk tan bazeia ba deit esperiensia no kapasidade ne’ebe iha.
Nia haktuir iha parte hotu ejiji uma mahon tenke iha pesoal pisikiatria hodi fo atendimentu ba vitima sira ne’ebe hetan trauma husi violasaun ne’ebe sira hasoru maibe to’o agora uma mahon hotu laiha pesoal pisikiatria.
“Agora dadaun ami seidauk iha pesoal pisikiatria ida tanba Timor –Leste rasik seidauk iha universidade ida loke kona ba pisikiatria nian,” nia hateten.
