Rede edukasaun Timor-Leste Coalition for Education (TLCE) kestiona maka’as profesores balun ne’ebe halo negosiu iha sala laran iha oras hanorin nian.
Jestor Programa TLCE, Matias dos Santos, konsidera situasaun ida ne’e seriu presiza intervensaun imediata husi ministerio edukasaun, tanba ida ne’e bele implika ba iha prosesu aprendijajen iha sala laran.
“Iha eskola balun ami identifika professores sira fa’an fali sasan hanesan vendedores iha eskola, ministerio tenke kria regulamentu ida ne’ebe rigorozu atu haree situasaun ida ne’e,” Jestor Programa TLCE Santos sujere, iha Kaikoli, Dili.
Nia haktuir, sasan hirak ne’ebe professores fa’an iha sala laran mak hanesan supermi, es, chocolate no seluk tan.
Nia hatutan, la’os ne’e deit, maibe inan aman sira mos okupa kompleksu eskola iha estrada ibun hodi fa’an sira nia sasan hanesan has budu, es, dosi no seluk tan ne’ebe bele prejudika ba labarik nia saude, tanba hahan sira ne’e rai rahun kona hotu ona.
Entretantu Prezidente Komisaun F (saude, edukasaun, kultura, veteranus no igualdade jeneru), Deputadu Virgilio da Costa Hornai, hateten situasaun sira ne’e akontese tanba ekonomia mak obriga, maibe importante labele abandona aula.
“Ne’e la’os problema grave, ita mos haree sitausaun ekonomia professores sira nian, importante labele halo fali profisaun negosio no abandona aula, ne’e mak labele,” Deputadu Hornai hateten.
Deputado ne’e mos sujere ba inan aman no professores sira atu organiza malu hodi loke kantin eskola nian hodi oferese merenda ruma ba estudantes sira no hatama mos insentivu ruma ba eskola hodi halao atividade seluk mos.
Hatan ba kestaun ne’e, Vise Mininistra Edukasaun Ensino Baziku, Dulce de Jesus Soares, rejeita informasaun ida ne’e, tanba sira seidauk simu informasan kona ba professores halao negosio iha eskola.
“Ministerio sei buka tuir informasaun ida ne’e, bainhira iha evidensia hatudu professores balun hala’o aktu ida ne’e, sei foti sansaun disiplinar hasoru professores sira ne’e tuir lei funsaun publika nian,” nia dehan.
