Sentru Nasional Matan servisu hamutuk ho organizasaun Internasional The Fred Hollows Fundation NZ realiza atividade konsulta matan gratuita ba komunidade.
Diretur Sentru Nasional Matan (SNM), Marcelino Vicente Correia, hateten aktividade ida ne’e atu komemora loron mundial matan ne’ebe monu iha (10/10) ho objetivu atu fo hanoin ba komunidade sira kona ba kauza moras matan no prevensaun.
Nia haktuir ,iha loron importante ne’e alende halo sosializasaun informasaun sira mos halao atividade konsulta matan gratuita ne’ebe loke ba publiku tomak atu asesu ba hodi halo exame ba sira nia matan.
“Enkoraja no fo hanoin nafatin ba ita nia komunidade sira katak moras matan ne’e importante presiza halo tratamentu lalais labele demora hein to’o grave ona mai iha fasilidade suade labele halo buat ida,” doutor Correia hateten, iha jardin Largo Lecidere,Dili
Nia hatutan, aktividade ne’e halao loron tomak halo exame matan, konsulta ba sira ne’ebe presiza oklu fahe oklu no sira ne’ebe presiza halo operasaun referal ba sentru nasional matan hodi halao operasaun.
Nia hatutan liu, tema ba tinan ida ne’e mak salva matan hadia moris atu sosializa informasaun ba komunidade sira hotu katak matan ne’e esensial tebes ba moris tanba matan at labele halo atividade seluk hodi sustenta moris.
“Komunidade barak mak iha problema matan, maibe sira tauk atu halo operasaun no konsulta tanba falta kuinesementu tau fali ai tahan tradisional sira ba matan halo matan sai grave lori mai fasilidade saude labele halo buat ida,” nia dehan.
Iha parte seluk, pasiente Teodoro Pereira Gonçalves kontente ho atividade ne’e tanba fo ona oportunidade ba sira atu halo exame ba matan tanba matan importante tebes ba moris ema ida-idak nian.
“Hau hare informasaun taka iha merkadu laran entau hau aproveita tempu mai halo exame bah au nia matan atu hatene no halo tratamentu sedu tanba matan esensial tebes ba hau nia moris,” dehan Nia.
Entretantu, Jose da Costa konsidera asaun ida ne’e positive tebes tenke halao kada fulan iha teritorio tomak atu fo oportunidade mos ba komunidade sira ne’ebe iha area rural atu hetan tratamentu ida ne’e tanba problema matan kuaze iha teritorio tomak iha.
“Governu no instituisaun relevante sira kada tinan tenke halao programa ida ne’e iha teritorio tomak liu –liu iha area rural atu sir abele hetan mos atendimentu ida ne’ebe diak tanba problema matan iha Timor barak tebes,” nia sujere.
