Polisia Nasional Timor-Leste (PNTL) kria Sistema Avaliasaun Dezempenha (SAD) hodi halo avaliasaun ba atitude membru Polisia sira wainhira halo’o sira nia knar iha terenu.
Segundu Komandante Polisia Nasional Timor-Leste (PNTL), Komisariu Afonsu de Jesus, hateten avaliasaun ne’e halo hodi fo valor ba sira nia komportamentu servisu no lala’ok loron-loron iha institusaun PNTL nia laran.
“Nune’e iha futuru ema ruma karik sa’e ba diviza, ninia ezemplar iha kedas ona no bele jere nia funsaun ho diak, no hatudu nia prestizu (pengabdian) instituisaun nian rasik ba iha komonidade sira,” Komisariu de Jesus hateten, iha Sentru Formasaun PNTL, Comoro Dili.
Nia hatutan, sistema avalisaun dezempenha ne’e halo bazea ba diskusaun ne’ebe halo iha fulan Agostu no Outubru 2014 entre KomandoJjeral ho komandante distrital sira.
“Diskusaun ne’e remata tia sei aprezenta fali ba komando jeral depois komandante jeral sei aprova foin mak ita komesa hahu ona avaliasaun kada membrus idak –idak,” dehan Komandante De Jesus.
Entretantu Komandante Polisia disritu Lautem, Superintendente Marcos Sequiera Nunes, hateten ne’e nudar pasu ida ne’ebe diak tanba komesa halo ona avaliasaun ba membru sira nia attitude.
“Ne’e hanoin ne’ebe mak positive tebes oinsa atu eleva PNTL ne’e ba oin diak liu tan,” nia dehan.
Iha fatin seluk Deputadu Cesar Valente, hateten planu ida ne’e bazea mos ba idea husi komisan B (Seguransa, Defeza, Negosiu Estrangeiru) hodi halo avaliasaun ba pesoal membru Polisia sira hodi nune’e bele hadia Instituisaun Polisia Nasional Timor-Leste (PNTL) diak liu iha future.
“Halo hanesan ne’e par sira nia didikasaun ne’e tenke masimu, intermus disiplina, oinsa bele halo’o orden komando ninian ho seriu no responsabilidade,” dehan Deputadu Valente.
Nia mos hatutan sistema ne’e halo hodi membru polisia sira bele halo’o sira nia servisu iha baze ho professional.
