Sekretaria Estado ba Promosaun Igualdade (SEPI) koopera ho organizasaun Fundasaun Alola fo kapasitasaun ba feto membrus Parlamentu Foinsa’e kona ba direitus humanus liu –liu direitu feto no advokasia.
Diretor Jeral SEPI, Armando da Costa, hateten programa kapasitasaun ida ne’e primeiru vez SEPI realize hamutuk ho Fundasaun Alola (FA) no Conselho Nasional Joventude Timor –Leste (CNJTL) atu hakbi’it feto foinsa’e sira nia kapasidade hodi kontribui ba iha promosaun igualdade jeneru iha rai laran.
“Partisipasaun foinsa’e importante tebes iha promosaun igualidade jeneru iha rai laran, ita kuda kedas mentalidade ida iha sira nia hanoin hodi promove,” DJ da Costa hateten, bainhira halo abertura ba iha formasaun kapasitasaun, iha Fundasaun Alola, Dili.
Nia hatutan, ho formasaun sira ne’e bele produs lideransa ida ne’ebe diak no sensivel ba jeneru iha futuru.
“Ba futuru ita espera bele hetan lideransa ida ne’ebe diak no iha vizaun ida klaru no sensivel ba jeneru,” nia esperansa.
Iha fatin hanesan, Diretora Ezekutivu FA, Alzira Reis, hateten materia ne’ebe sei fo ba partisipantes sira mak hanesan direitus humanus, direitu feto, planu advokasia, orsamentu sensivel ba jeneru.
Tuir nia, informasaun hirak ne’e importante ba sira nudar reprejentante feto foinsa iha distritus.
“Alin sira hetan formasaun barak ona iha area oioin, maibe atu haree liu ba aspeitu jeneru mak sei limitadu, tanba ne’e ami foka ba area ida ne’e,” Diretora Reis hateten.
Entretantu reprejentante feto foinsa’e distritu Bobonaro, Tania de Fatima, agradese tanba konvida ona sira involve iha programa advokasia atu sira mos bele kontribui halo advokasia ba asuntu sira ne’ebe feto foinsa’e sira infrenta iha area rural.
“Problema ne’ebe foinsa’e feto no mane sira hasoru iha ami nia distritu Bobonaro mak hanesan kaben sedu, dezempregu no la asesu informasaun,”nia hateten.
Nia dehan, programa ne’ebe durante ne’e governu no sosiedade sivil sira halo konsentra deit iha capital distritu.
Nia haktuir, sira mos koopera ona ho sosiedade sivil local sira fo kapasitasaun hanesan saude reprodutivu no importansia edukasaun ba iha futuru ba feto sira iha area rural inklui mos hato’o ona iha plenaria.
Formasaun durante loron tolu ne’e hetan partisipasaun husi reprejentante feto parlamentu foinsa’e husi 13 distritus ne’ebe apoiu fundus husi SEPI ho montante (Lima puluh ribu dolar) inklui mos atividade seluk.
