Rekursu finanseiru sai bareira bo’ot ida ba Sentru Estudu Jeneru iha Universidade Nasional Timor –Lorosa’e (SEJ-UNTL) atu hala’o atividade peskiza no debates akademika ho asuntu prespetiva jeneru.
Vise Koodenadora SEJ-UNTL, Judite Dias Ximenes, hateten sira iha hanoin atu halo peskiza ba asuntu sira ne’ebe fo impaktu bo’ot ba iha dezenvolvementu feto iha Timor –Leste.
“Hanesan problema insestu, feto isin rua fila ba eskola no soe bebe, maibe ami laiha orsamentu ida apropriadu hoi fasilita ami nia ekipa halo levantamentu dadus,” Vise Koordenadora Ximenes hateten, iha Dili.
Alende ne’e, nia informa, sentru mos sei falta infra-struktura hanesan edifisio no fasilidade seluk atu apoiu rekursu humanu ne’ebe iha ona hodi hala’o atividade peskiza hodi kontribui ba estado.
Durante ne’e, nia hateten, SEJ organiza ona debate akademiku lubuk ida ho topiku oioin, hanesan feto iha libertasaun, feto iha empregu no abordajen jeneru iha edukasaun.
“Atu estudantes sira mos bele iha konesementu no fo hanoin ba prosesu dezenvolvementu igualdade jeneru iha Timor –Leste,” nia hateten.
Alende organiza debate akademiku, nia hateten, iha tinan kotuk SEJ servisu hamutuk ho Ministerio Administrasaun Estatal (MAE) hala’o ona peskiza ida kona ba jestaun lixu iha familia.
No oras ne’e dadaun, nia hatutan, halo hela levantamentu dadus kona ba bee no saneamentu, mal nutrisaun, impaktu eletrisidade ba ekonomia familia no feto iha agrikultura ne’ebe hetan apoiu husi Sekretariadu Estado Promosaun Igaulidade (SEPI).
Iha parte seluk, Sekretaria Estado ba Promosaun Igualidade Jeneru (SEPI), Idelta Maria Rodriegues, hateten Timor –Leste ratifika ona tratadus internasional lubuk ida ne’ebe kada tinan hato’o relatorio kona ba implementasaun tratadus sira ne’e iha Timor –Leste, tanba ne’e baze de dadus ne’e importante tebes.
Nia haktuir, ba futuru SEPI sei nafatin prepara no haforsa sentru estudu jeneru sai sentru estado nian atu bele prepara dadus sira estado nian, nune’e ema ruma mai husu dadus kona ba dezenvolvementu feto, bele foti iha sentru ne’e.
“Ami sei prepara no haforsa Sentru Estudu Jeneru UNTL sai sentru estado nian hodi prepara dadus sira ne’ebe relevante ho igualidade jeneru liu –liu dezenvolvementu feto Timor –Leste,” SE Rodrigues hateten.
